«Шун хьинар, лелалуш хилар моллагӀчо а иразе лоархӀаш да. Шоашта гонахьарча шоай дезалий дезалаша дог хьесталда шун. Могаш хилда шо, тхо гӀад а кхувлаш, дахалда шо тхона»,- цу тайпарча дег чура доагӀача дешашца ловца баьккхар Келаматанаькъан Махьмуд-Ӏаьлас вай къоаношта. ГӀалгӀайчен бахархой, дӀаьха вахар дола нах бахача мехкашта юкъе ба. ДӀадахача шера вай республике 78 шерга кхоачаш нах бахаш хилар белгалдир, из Россе 2030 шерга кхоачаш наьха хургья аьнна оттаяь ха я. Из иштта хилара бахьанаш дукха да, керттердар да, вай къоаной даим лела Ӏема хилар, кулгаш вӀашкадаьхка багӀа безам боацаш хилар, цул совгӀа, шоаш болча фусамашка безаш лелабар, царна даим терко еш хилар.