ГӀалгӀайчен Кулгалхочо мехкахой даькъалабийцар мовлата беттаца
27.09.2023 11:55
ГӀалгӀайчен Кулгалхочо Келаматанаькъан Махьмуд-Ӏаьлас дег чура даькъалабийцар беррига ГӀалгӀайчен бусалба нах мовлата бутт хиларца, яхаш, дийцар «Сердало» газетага мехка кулгалхочун зарбан болх лелабераша.
«Цу сийрдача цӀайно нах шоайла вӀашкаоз, дерригача дуненна дӀагойт, АллахӀо вайтачун (АллахӀо даькъала ваь тӀаэцалва из) хоза гӀулакхаш, цо ший вахар дӀаденнад дикача гӀулакхашта, ислама лоархӀамедараш доаржадеш», - йоах ший телеграм-канале ГӀалгӀай Республикан кулгалхочо.
Цо дег чура даькъалабийцар, хьамсарча мехка бахархой; ираз, аьттув, машар, дика вахар цар хилар ловш.
