Баьча балхах РФ Паччахьалкхено дийцачун хьакъехьа хьоахадир вай Мехкадас
Мехкарча Паччахьалкхено дӀахьоча балхах дийцар Паччахьалкхен Думага Россе премьер-министр волча Мишустин Михаила. Цох лаьца хьоахадир ший бувзама оагӀонашка вай мехкадас Келаматанаькъан Махьмуд-Ӏаьлас. Республикан кулгалхочо белгалдир, санкцеша низ баьбале а, вай мехкара экономика, йоха ца йохаш, цхьайолча оагӀонашка дикка тоалуш латтилга, масала, гӀишлон, юртбоахама, дешара, унахцӀенон оагӀонаш.
Мехкадас теркалдир, тӀехьарча шин шера республикера промышленность дегӀайоагӀаш латтилга, дӀадахача шера из 13% хиннилга. Къаман проекташ вай ГӀалгӀайченна мел беркате хиннай хьоахадир Мехкадас.
«Белгалде деза, тахан Президента чӀоагӀонца юкъе мел даьхараш наьха вахара хьал тоадеш, дезалаш хьаллоацаш, тайп-тайпарча моттигий гӀулакх меттаоттадеш долга», - аьлар Мехкадас.
Иштта тӀатехар, тахан юкъедаьхараш бахьан долаш, республикан хьал дӀахойодача хана а дикка тоаде аьттув хургболга.
