Вахаре гӀо дарах йолча моттига лаьрхӀа хьалъеча гӀишлонга хьожаш хилар Мехкада
Ха яхача наха, дегӀа могашал эшаеннарашта гӀо дара йолча моттига лаьрхӀа хьалъеча гӀишлон болх малагӀча боараме дӀахьош ба тохкаш хилар вай Мехкада. «Демографи» яхача къаман проекта «Боккхий нах» яхача моттигерча проектага гӀолла дӀахьош ба из болх. 50 сага моттигаш йола гӀишло МагӀалбике хьалъеш латт. Из хоам «Сердалога» бир Мехкадаь зарбан болх лелабераша.
Кхален, шахьара бахархошта лоархӀам болаш моттиг хургья кхозза вӀаштӀаръяьча гӀишлох. ХӀара гӀата тӀа шийла, дӀайха фо лоаттадергаш, иштта кхыбола эшаш мел бола кхоачам хургба. УнахцӀенон оагӀонцара гӀо лоаттадеш йолча цу моттиге шоай дегӀага хьажийта, лорашка чакхбала, психологически оагӀонцара новкъостал эца аьттув баргба наьха.
Спорта лаьрхӀа зал, дегӀ хьувш дарба дӀахьош йола кабинет (массаж), кхетачеш дӀакхахьа, кхача кийчбе моттигаш хургья цига. ДегӀа могашал эшаеннарашта лаьрхӀа лифт хургья цу чу, иштта шоай гаргарча сагаца цига ха яккха йиш йолаш кийчо хургья.
«Ха яхача, дегӀа могашал эшаеннача нахага хьажар, царна гӀо дар эггара лоархӀамеча гӀулакхех да вайна тахан. Республикерча Паччахьалкхено тӀахьожам лоаттабу цу гӀулакха, ма хулла цу оагӀонца дувзаденнараш тоаде гӀерташ», - белгалдир Келаматанаькъан Махьмуд-Ӏаьлас.
