Илдарха-ГӀалий тӀара цӀенош меттаоттадара тӀахьожам лоаттабу Мехкадас
22.03.2024 11:51
КТО дӀахьош йохаяь хинна Илдарха-ГӀалий тӀара квартираш меттаоттаеш бола болх малагӀча боараме дӀахьош ба хьожаш, тӀахьожам лоаттабу Мехкадас. Из хоам «Сердало» газетага бир мехка кулгалхочун зарбан болх лелабераша.
«Юха а белгалду аз, бахархой ма хулла сихагӀа хьачубахкийта беза шоай цӀеношка. Тахан вайна хьалхашка латта керттердар да из», - аьлар Келаматанаькъан Махьмуд-Ӏаьлас, квартираш тоаеш дӀабихьача балхага хьожаш.
Болх дика чакхбаьккха, квартирай даьй раьза хургболча тайпара хила беза, яхаш, дийцар Мехкадас. Шахьара мэра цо тӀадиллар, квартирашкара арабаьннача нахаца хӀара денна бувзаме волаш, цар мел дола хаттараш доашхаш хила, аьнна.
