НачӀал дола ГӀалгӀайчен бархӀ шу даьнна кӀаьнк финалага кхаьчар, из хержар «Нагахьа санна новкъостаца наькъа ваьннавале» яха илли аларах Россе халкъа артистка Гурцкая Диана кертте йолча кхело. Мехка Кулгалхочо цхьа шу даьлча пианино лургба аьлар цунна, нагахьа санна цо дӀахо а иштта кхоллама даькъе къахьегаш хуле. «Кастлуш Мухьмад Москве гӀоргва, цига дакъа лоацаргда гала-концерте. Оаха новкъостал дергда Келиганаькъан дезала, царна столице Ӏе атта хургдолаш. Со тешаш ва, Мухьмада кхы а дукха толамаш доахаргда аьнна. Вай республико дӀахо а терко лоаттаергья бӀаргса доацарашта а иштта бӀарга са во долчарна а, иштта шоашта карагӀдоалар гойта безам болча берашта а»,-аьлар Келаматанаькъан Махьмуд-Ӏаьлас. Белгалдоаккх, «КӀай Ӏаса» яха фестиваль Гурцкая Дианай дикача гӀулакхий фонда «Дег чура йоагӀаш» проект хилар. Из бӀаргса дайнача а хӀама во гуча а берашта лаьрхӀа я, цо таро лу царна иллей, ашарий даькъ тӀа шоашта карагӀдоалар гойта. Карарча шера ГӀалгӀайче дакъа лоацаш хиннача Къилбаседа Кавказа начӀал дар харжара йола фестиваль мишта дӀайихьар дийцар «Сердало» газетага. ХьатӀадоагӀача шера «КӀай Ӏаса» яха юбилейни фестиваль вай республике дӀаяхьа лерхӀ. Шийна иштта лов аьлар Келаматанаькъан Махьмуд-Ӏаьлас, халкъа артисткаца Гурцкая Дианайца кхетаче йолаш.