Геттара лакха мах оттабир Мехкадас, Гуцаранаькъан Микаила таьрахьий гӀулакхах йолча проектá
Таьрахьий гӀулакх даржарах йолча, «Ишкол 21» яхача Гуцаранаькъан Микаила йоккхача проекта лакха мах оттабеш, къамаьл дир вай Мехкадас Келаматанаькъан Махьмуд-Ӏаьлас. Из хоам «Сердало» газетага бир Мехкадаь зарбан болх лелабераша.
«Аз доккха баркал оал Гуцаранаькъан Микаила, иштта дог лазаш, шийна мога новкъостал деш, вай республикага хьажарах. Доккха, беркате гӀулакх да ер таханардар.
ХӀанзчул тӀехьагӀа итташ шераш дӀадахача кхетадергда вай, мел лоархӀаме, эшаш проект хиннай Гуцаранаькъан Микаила юкъейоалаяьр. Таханарча ханаца гӀа боаккхаш, къахьега ловрашта хам баь варгвоаца дика да из! Аьннача дош долаш, саг ва хьо - дергда аьннар хьадаьд!» - белгалдир вай Мехкадас ший телеграмм оагӀон тӀа.
Программированех дола керттердараш, мах бала ца безаш, довза; цу ишколера говза професси караерзае аьттув ба моллагӀча сага. 300 совгӀа ладувгӀараш гулбеннаб хьалхарча мугӀарца. Царна юкъера дуккхабараш цхьацца балхаш довзаш, леладеш ба, тахан шоай къахьегамцара кердадараш дайзар царна, шоай начӀал кхы а шерагӀа доаржаде аьттув ба цар, керда наӀараш хьайийлла.
