«Тахан вай мехка цIий дIачутелача донорий къаман ди дездеш да. Из ди хетадаьд наьха могашала оарцагIбаьнна, шоашта могаш дола гIо деш, мах боацаш цIий дIачутеларашта. Цу юкъе ба цIий дIачуийдеча станце къахьегаш бола лораш. Тахан цу деррига гIулакха тIахьожам беш, кийчо еш, цар дIакхухьа болх, мах баь варгвоацаш ба», — аьлар Мехкдас.

Цо белгалдир, из гIулакх, тахан, мелла лоархIам болаш да. КIалвиса саг кIалхараваккха йиш я, цхьан саго дIачуденнача цIийца. Тахан, эггара дукхагIа, из гIо эшараш цIийцара хала лазараш дола нах ба, хIаьта царна юкъе дукхагIа дараш бераш да. Авари яь сихха гIо эшача сага, мелла хам баь варгвоаца новкъостал да, цхьан сага цIий.

«Дег чура доккха баркал оал аз, из беркате гIулакх шоашта хьатIаийцачарна! Баркал хилда шоана, иштта къахетаме, наха оарцагIдовла ловш хиларах! Ираз, аьттув болаш, могаш долаш дахалда шо!», — йоах Мехкдас ший къамаьла юкъе.