Из деза ди дIадоладелар телевидене, радион музей хьаелларца, ВГТРК хьайийллача дийнахьа денз цун хинна гIирс гойташ.

«Юххьанца из телевидени хьаеллар вай бахархоша чIоагIа дог гIоздаларца тIаийцар, вай мехкарча а доазол арахьарча а бахархошта боккха кхаъ хилар цох. Из боккъонца йола республика дегIайоалаяра исторически оагIув хинна дIаэттар, вIалла ца хинна хувцамаш доладелар из хьаелларца», — аьлар Махьмуд-Iаьлас.

Махьмуд-Iаьлас яхачох, ерригача республиканна дагадоагIа, мел йоккхийча халонех чакхьяьлар телевидени, мел дукха хIама хувцаденнад цу хана денз. Массаза а эггара лоархIамеча ханашка телевидени, бехктокхаме а йолаш, дика къахьегаш хьайоагIа даим.

Телевидене болхлоех дувцаш, региона кулгалхочо белгалдир, шоаш хержача профессена мутIахьа болаш, даим говзал лакхъеш телевидене болхлой хьабоагIаш хилар.

Керттера терко тIаяхийтар укхаза, телевидени хьайийллача хьалхарча деношка денз, къахьегаш хьабоагIарашта карагIдаьннарашта.

Цо белгалдир мехкарча юкъара-политически, вахара-экономически даькъошка телевидене керттера моттиг дIалоацаш хилар. Нийсхонна тIехьа хилара тIахьийхар цо уж.

Иштта цо белгалдир, кхувш йоагIача вай тIехьенна лерттIа кхетам балара, телевидене болхлоша доккха дакъа юкъехьош хилар.

ГIалгIайчен кулгалхочо балха говзал йолча а иштта къонача а журналисташта ловца баьккхар, дIахо дIайодача хана а цар шоай балха тIа лакха толамаш дахар ловш.

Къаьстта а теркам тIаозаш хиннар яр, грамоташ а совгIаташ а луш хинна моттиг, уж елар дукхача шерашка къахьегаш хьабоагIача телевидене, радион болхлошта.