«Тахан вай дездеш дар Даьхен турпалхой ди да. Укх дено чулоац, тайп-тайпарча ханашка вай мохк лорабеш, шоашта тIадехка декхараш дизза кхоачашдеш, лаьтта эздий къонахий! Вай къаман массахана хиннаб, цун сий доаккхаш, яхь лораеш, дуккханешта масал луш бола турпалхой. Эггара халагIа йолча хана, шоай къонахчал гойташ, кхебаьрий юхь кIайеш лаьттаб уж.

Вайна тIехьа дукха толамаш да! Советски Союза турпалаш болаш баьхаб Оздой Мурад, Къоастой Ширвани, Малсаганаькъан Ахьмад, Овшанаькъан Руслан, РФ турпалхой хиларца белгала ба Осканаькъан Сулумбик, Евкуранаькъан Ювназ-Бек, Къоастой Абубукар, Келаматанаькъан Iалихан, Налганаькъан Руслан, Котанаькъан Ахьмад, Къоастой Абубакар, Хамхой Адам, Iарапханаькъан Марем. Вай къаман геттара лоархIаме цIераш я уж! Таханарча дийнахьа Украинерча тIема юкъе, деналах ца бохаш, вай къаман сий лорадеш, латт вай кагий нах.

Уж ба Даьхен сий лораду къонахий! Уж хиларах доаккхал де деза вай массане. Аз даькъалабувц укх денца, Даьхен гIулакха мел лаьттараш! Иразе, даькъала хилба вай мохк!», — аьлар ший къамаьла юкъе республикан кулгалхочо.