«Укх беттара 22-гIа ди, фашисто боккха тIом тIабена ди хиларал совгIа, вай сийдола, майра къонгаш байна ди да бIехача моастагIчун тийшабелхаца. Сага сибатех дола уж оакхарий, боккха бала бахьаш чухьалхар вай мехка. Шоай къаман моаршо лораеш лаьтта нах, ма хулла, дукхагIа боабе вIашагIбелла тийшаболх бар из. Цхьаккха бехк боацаш шоашка гIолла болх дIахьош лаьтта къаман денал дола болхлой боабир, бIехача уйлай бIы кер чу белла арабаьннача Даьла моастагIаша. Цу Iаьржача деноша, ла ма могга, бала бера гIалгIай хIара цIагIа.

Из гIайгIа, тахан а, дIаяьннаяц наьха кер чура. Вош, да, воI, цIен да — байнарий дегаш хIанза а лешаш латт. Из хало дерригача къаман хало я! Ала деза, шоаша лаьрхIа хиннар, ма хетта, дIакхоачашде аьттув боацаш бахар террористаш яха унзара хIамаш. Дуккха халонаш лайна, Iазап такха долча вай къаман хала ди дар из! Дунен исторе цIаккха а дицлургдоацаш даха дисар из Iаьржа ди. Вай мехка президент волча Путин Владимира текха Iазап дувцаш аьлар: » МоастагIчоа кIезига хетар ше нахагара цар лаьтта дIадаккхар! Цо лерхIар къаман лар лаьттара хоадае, хIаьта бисарех лай бе. Царгара мотт, культура, Iадаташ дIадаьха шийна чуоттабе воаллар моастагI вай нах. Тахан дагадоха эттача, уйлашка Iоцадужаш да цар бераш, боккхий нах, кхалнах боабеш леладаьр. МоастагIчун бIеха уйлаш йохайир, аьчар советски союзе баьхача наьха бувзамо, денало, дог-майра духьала оттаро«.

«ГIалгIай майра къонгаш фашист вохавеш лаьттарех ба. Брестски крепость хьайоаккхаш лаьттаб, Берлине дIачубаха рейхстаге чубаьннарашта юкъе хиннаб вай денал дола бIухой. Дега цIаккха а дицденна дIадаргдац уж денош, шоай вахар дIаденна нах! Республика маьрша денош лорадеш, деналах ца бохаш моастагIчоа духьала лаьттарий цIераш- исторера дIайовргьяц. Кхы ма доагIалда вай къаманга уж тайпара хала денош! Иразе, гIоза, беркате бахалба гIалгIай мохк! Дала къахетам болба байнарех, Дала гешт долда царна», — аьлар ший къамаьла юкъе Мехкдас Келматанаькъан Махьмуд-Iаьлас.