ГӀалгӀайче гӀолла йолча Россе МВД кулгалхо хилар, Наьсарен вахара хьалаш довзаш
ГӀалгӀайчен чурча гӀулакхий Министерствон кулгалхо, полице полковник Козярский Алексей, шийца СКФО гӀолла йолча Россе МВД ГУ Юкъарча кхела доакъашхо, ГӀалгӀайче гӀолла йолча МВД Юкъарча кхела кулгалхо Гаданаькъан Муса, иштта республикан Халкъа Гуллама депутат ГӀазданаькъан Ислам волаш, Наьсарен-Шахьаре вахар. Уж бахара бахьан дар, полице болхлоша рейдови кхетаченаш мишта дӀахьу хьажар.
Керттера терко тӀаяхийтар наькъаш тӀа бе безача балха, бокъонаш телхаяр соцадара.
«Кхетаченаш дӀахьош, бокъонаш лораерашта гучадаьлар 69 административни гӀулакх, цу юкъе 20 гӀулакх доагӀаш дар РФ КоАп 3.1 д. 12.5 ст. (кораш баьддара).
Полице болхлоша къахьийгар цу моттиге уж кхоачамбоацараш юстардоахаш, 22 автомашина кизгаш мукъадаьхар, полице дӀайигар 4 транспорт. Из доацаш, полице болхлоша гучадаьккхар, иштта хьа а даьккхар новкъа леларашкара 2 поатронаш чуйоаца герз, 6 ехк, 100 цунцара герза кхоачам, чӀоагӀа корта бохабеш йола молхай 2 капсула, иштта 36 шу даьннача Наьсарерча вахархочунгара «Retay 17» хьаийцар, ше раьза волаш, хьаенна яьсса тепча. Цо яхачох, из цунна кораяьяр цӀермашинаш лелача наькъа гаьна йоацача хьун йистера, М. Шаймиева цӀерагӀча урамах»,- аьлар «Сердало» газетага ГӀалгӀайче гӀолла йолча Россе МВД зарбан болх лелабераша.
Цхьана цига бахарах цар таро хилар балха мах оттабе а, иштта ГӀалгӀайчен бокъонаш лораечар, юкъарча, законаш леладара долча Ӏаьдала викалашца къамаьл де а, мехка кхерамзленна Ӏалашо ярах, бокъонаш лораярах дувца.
Цига баха хиннача доакъашхоша хьехама къамаьл дир бокъонаш телхаерашка, водителий сакхетам кӀеззига мукъагӀа сомабаккхар духьа, наькъашка уж шортига леларгболаш, наьха а шоай а вахар лорадара терко еш хургболаш. Царна иштта хьалхадаьккхар цхьан сахьата деррига вахар сага хувцалуш моттигаш йолга, наькъ тӀа еш йола авареш бахьан долаш. Водителашта иштта хоамий каьхаташ делар, наькъ тӀа кхерамзлен бокъонаш лораярах дола, иштта ПДД телхаеш хиларах хьадоала зуламаш а дувцаш.
