ГӀалгӀайчен паччахьалкхен драматически театро «Шин гаргарча сага киловзал» яха спектакль гойтаргья
08.09.2023 16:16
Базорканаькъан Идриса цӀерагӀча ГӀалгӀай паччахьалкхен драматически театро вай бахархошта, хьаьшашта гойта лерхӀ къаман драматурги дегӀакхувлаш йола шоай балха говзал. Театра артисташа гойтаргья «Шин гаргарча сага киловзал» яха спектакль, Горчхананаькъан Бадрудина пьесах из оттаяьр ва республикан халкъа артист Галай Мурад.
«Спектакле дувцаргда сага дего къайлагӀа еча унзарча уйлах, шоашта дикадар хилча кхы сагота боацаш, наха шоашта гонахьарчарна халахетар деш хиларах.
Махмадхан хӀама хьадеш, саг йоалае езаш зӀамига саг ва. Москве а ваха, дика ахча даккха лерхӀ цо. Цу юкъегӀолла лоалахо Рая цунга ший гаргара йоӀ яхийта гӀорт, кхы ха ца йоаеш. Цу гӀулакха тийшаболх вӀашагӀболл цо... Иштта чулоацам ба цу спектакла», — аьлар «Сердало» газетага ГӀалгӀай паччахьалкхен драматически театре.
Спектакль хургья, тов бетта 27-ча дийнахьа 12 сахьат 00 минот яьлча, Наьсарен культуран ЦӀагӀа. Къонача хьажархой таро я Пушкински картах цига баха.
