Наркомани яхача зуламах дувцаш, хоамий сахьат хилар Яндаре
Наркомани яхача доккхача, бӏехача зуламах дувцаш, «Сабарде, уйла е» яха кхетаче дӏахьош хилар берашца, Яндарерча культуран Цӏагӏа. Кхувш латтарашка дийцар цу дохьажо сага вахар дохадарах, ираз доадарах, иштта цу зулама духьале еш кхоачашде дезарех. «Сердалога» из хоам бера цу моттигера.
Культуран Цӏен болхло йолча Йовлой Мадинас берашка дийцар сага унахцӏенон, психически хьала наркотикаша деча зенах, цкъа цу бӏехача гӏулакха юкъе вахачунна, тӏехьагӏа наха юкъе тешаме саг хинна дӏаотта хала хургдолга, уж нах шоаш шоай ираз доадаьрех болга.
Наркотикашца бувзам лелабар ӏаьдало боаггӏача боараме бехктокхаме озаш хӏама долгах дийцар къонабарашка. Бераша дикагӏа кхетадергдолаш, вахарера цхьацца масалаш кхувлаш, дӏайихьар кхетаче.
Йовлой Мадинас берашта хьалхадаьккхар; массахана спортаца бувзам болаш, кадай, хьинаре, кхоллама вахаре дакъа лоацаш хила, аьнна. Иштта йола кхетаченаш къонача тӏехьенца дӏакхахьар тахан геттара лоархӏаме да, хӏана аьлча водар, дикадар, бера хана денз, къоастаде ховш хила еза вай тӏехье.
