ГӀалгӀайченна бюджета кредитий лоархӀаме дакъа дӀакъовларгда
Президентаца Путин Владимирца, РФ ахчан министраца Силуанов Антонаца кхетаче дӀахьош, Россе 79 моттига бюджетни кредиташ, дӀадала ца дезаш, тӀера дӀадоахаргда аьлар. Цо таро лургья республикан ахчан хьал тоаде, яхаш, дийцар ГӀалгӀайчен Кулгалхочо Келаматанаькъан Махьмуд-Ӏаьлас.
«Декхараш тӀера дӀадахара йолча моттигашта юкъедаха таро хилар дӀаяхийта йиш йолаш моттиг яцар. Оаха дӀадаккха аьнна оттадаь декхар 1,2 млрд сом дар», - аьлар вай мехка кулгалхочо.
Хьадайта ахча дӀадохийтаргда керттера декхараш кхоачашдара, царна юкъе да хин турбаш тоаяр, инвестицей проекташ хьаллацар, иштта СВО доакъашхошта, цар дезалашта новкъостал дар.
Белгалду, 66% бюджетни кредитах дола декхар дӀадаккхар кхоачашхургда кхаь шера, 2025-ча шера денз 2027-ча шерга кхаччалца.
