ГӀалгӀайченна хьахьожадергда СВО доакъашхой хьаллаца ахча
ГӀалгӀайче юкъейоагӀаш я, Россе паччахьалкхено СВО доакъашхошта ахча хьожаде лаьрхӀача моттигашта. Из новкъостал ду бӀухошта, юртбоахама даькъ тӀа шоай бизнес хьаеллара. Цох дийцар ГӀалгӀай Республикан Кулгалхочун, Паччахьалкхен зарбан болх лелабераша.
ГӀалгӀайчен кулгалхочо Келаматанаькъан Махьмуд-Ӏаьлас белгалдир, «Агромотиватор» яхача программан юкъе дакъа лоацаш хилар лоархӀаме гӀа ба юртбоахама даькъ тӀара хьал дегӀадоаладара а, ветеранашта новкъостал дара а:
«Оаха баркал оал федеральни центра из таро тхоашта яларах, цо СВО доакъашхошта новкъостал дергда шоашта ховш дар юртбоахама даькъ тӀа кхоачашде, керда балха моттигаш хьаелла, мехка экономика чӀоагӀъе».
Белгалдаккха деза, агробизнесацара безам тахан республике гуш ба: духхьала маьтсела бетта «Агростартап» яхача программаца дувзаденна дӀачуденна 195 дехар да. Цул совгӀа, карарча шера бекарга бетта денз, «Фермерий ишкол» яха Россельхозбанко дӀадоладаь керда гӀулакх дӀахьош да, цига СВО доакъашхоша Ӏомаю агронома, зоотехника профессеш.
«Агромотиватор» яха программа юкъеяьлча денз, ветеранашта тӀехьара тӀа таро я ахчанца новкъостал лоаттаде - 7 млн сомага кхаччалца хьайбаш леладара гӀулакх дегӀадоаладара, иштта 5 млн сомага кхаччалца кхыдолча юртбоахама гӀулакхашта. ГӀалгӀайчен Ӏаьдал кийча да проекташ нийсхо йолаш лелаяра, иштта эшаш дола каьхаташ дахара гӀо де.
«Со тешаш ва, «Агромотиватор» хиларо кхачан кхерамзле чӀоагӀъярал совгӀа, новкъостал дергда ветеранашта шоашта лерттӀа моттиг лаха, тӀем тӀара цӀабаьхкачул тӀехьагӀа», - аьлар Келаматанаькъан Махьмуд-Ӏаьлас.
