Гурахьа дувча ялата болх чакхбоаккхаш, паччахьалкхенгара гӏо хургда вай республиканна
Вай мехкарча юртбоахама ахархошта, паччахьалкхенгара новкъостал хургда. Ма дарра аьлча, 2027-ча шера ӏан кӏалха додаш дола ялат дӏадувча балха лаьрхӏа, Россе Паччахьалкхено баьча соцамах, вай республиканна хьожадаьд 32, 4 млн сом ахча. 22 российски моттига гӏо дергда федеральни оагӏоно, 13 млрд сом рузкъа да цу гӏулакха къоастадаьр.
Вай мехкадас Келаматанаькъан Махьмуд-Ӏаьлас доккха баркал аьлар Россе Паччахьалкхенна хьалха латтача Мишустин Михаила, вай республиканна иштта терко ярах. 2027-ча шера вай мехкарча ахархоша ӏан кӏалха додача ялата аьнна хьакъоастадаьр 27 эзар гектар лаьтта да. Юртбоахаме къахьегараша дикка болх бе дезаш гӏулакх да из – ханнахьа меттадоаладе деза лаьттан хьал, агротехнологически оагӏонца лоархӏамедараш боаггӏача боараме чакхдаьха хила деза. Федеральни оагӏоно хьожадаь ахча йоккха моттиг дӏалоацаш, дукха хӏама меттаоттадеш хул. Белгалде деза, тӏехьарча шерашка вай мехкарча юртбоахама хьал хоалуш меттадоагӏаш латтилга. Дӏадахача шера лаьттанца къахьегаш болча мехкахоша 125 эзар тонн совгӏа ялат чуийцар, 25, 5 млрд сомага кхоачаш кхоачам бар моттигерча юртбоахамо къахьегарах хиннар.
Вай Мехкадас белгалдир, юртбоахама гӏулакхашта хьахьожадаь ахча ханнахьа, даха деззача моттиге дӏадахийта дезилга. Лаьтташцара болх дӏаболалуча хана, хьакхоачаргда ахархошта паччахьалкхенгара новкъостал.
Боаггӏача боараме чакхбаккха безача цу балха лакха терко еш хургба мехка. Юртбоахама моттигий хӏама тоадаларах доккха гӏо хул юрташта, наха болх бе моттигаш ӏалашъю, республике вай лаьтташка кхебаь кхоачам хургба.
