«Цхьоагӏо. Эскар. Котало» яхача фестивале дакъа лоацаш хургья вай республика
Лайчилла бетта 4-ча дийнахьа, Россе герзашцарча низий Министерствон Керттерча музее дӏаяхьа лерхӏача «Цхьоагӏо. Эскар. Котало» яхача регионашта юкъерча фестивале дакъа лоацаш хургья вай республика. «Сердалога» из хоам тахан кхаьчар Гӏалгӏайчен массазарча викалгара.
Тха газетага дийцачох, гӏалгӏай къаман селханара истори, ӏадаташ, гӏулакхаш довза аьттув хургба наьха.
Актриса йола Харсенаькъан Марена хургья цига ший начӏал гойташ; иштта, ший болх ма барра дӏабовзийташ, исбахьален гойтам боаржабергба Куштанаькъан Эльмирас. Исторически ӏилман кандидат йолча Чабинаькъан Танзилас къаман оамалаш, тхьоврача хана денз лорадеш хьадахьа ӏадаташ, гӏулакхаш довзийташ лекци ешаргья цига, иштта кхыйола программаш а я кийчъяь цу гӏулакха.
Фестивала доазон тӏа хьокха оттадергда вай къаман дувхар, цӏагӏа лелаеш йола хӏамаш, литература, вай къаманца дувзаденна дола кхыдараш а. Цул совгӏа, гулбеннарий аьттув хургба гӏалгӏашта юкъе тхьовра денз кийчдеш долча даарех чам баккха.
Боккхача Россе мехка дахаш долча дукхача къамий вахарера хӏамаш, ӏадаташ, гӏулакхаш, истори довзийташ моттиг хургья цох.
