«Майрала кӀопилг» яха ерригача Россе болам хьаллаьцар вай мехка
Халача лазарах могаш доацача берашта лаьрхӀа бола «майрала кӀопилг» яха болам хьаллаьцар вай республике. Цу беркатеча гӀулакха хьалха эттар я «ЦаӀ йола Росси» яха парти. Из хоам «Сердало» газетага бу «ЦаӀ йола Росси» яхача парте болхлоша. ХӀара сага дакъа лаца йиш йолаш беркате гӀулакх да из.
«Берашта совгӀата лаьрхӀа эца йиш я книжкаш, фломастераш, теникаш, машенаш, иштта кхыйола берашта сакъердам хургбола хӀамаш. Еррига хӀамаш дарбанче дадача берашта дӀаекъаргья. Магасерча реабилитационни оалача моттигерча берашта, Даби-Юртарча дегӀа могашал эшаеннача берашта лаьрхӀача интернате-ишколе дешарашка совгӀаташ дӀакхаьчад», - белгалдир «ЦаӀ йола Росси» яхача моттиге.
«Майрала кӀопилг» яхача болама лаьрхӀа совгӀаташ дита йиш я укх адресах: Магас, Заьзганаькъан цӀерах бола урам, № 8.
