«ГӀалгӀай Республикан кулгалхо Келаматанаькъан Махьмуд-Ӏаьла дакъа лоацаш хилар, доазол арахьарча гӀулакхий министр Лавров Сергей кертте а волаш, Москве МИДа дӀахьош хиннача, РФ моттигий кулгалхой Совета 41-ча кхетаченна юкъе», - йоах хоамо. Келаматанаькъан Махьмуд-Ӏаьлас белгалдир; из болх вай республиканна лоархӀаме ба, аьнна. ДӀахо а халкъашта юкъера бувзам лелабара, цо пайда бахь. Цхьайолча Белоруссеца, Гуржий мехкаца бувзам лелабарах йолча проектех дийцар. Карарча хана, туризм накъайоал халкъашта, паччахьалкхенашта юкъера бувзам чӀоагӀбара. Дукха ха йоацаш, Белоруссеи ГӀалгӀайченои барт баьб, из оагӀув дӀахо дегӀайоалаяра тӀехьа. Цунна нийса кийчъеш я Кавказа сий долча лоамашка гӀолла туристаш лелара йола проект. ЛаьрхӀар дикагӀа кхоачашдара, говзанчаш къахьегаш ба Белоруссена, ГӀалгӀайченна юкъе фецара кемаш леларгдолаш. ГӀалгӀай Республикан Кулгалхочо яхачох, цу проекто таро хулийтаргья Российски Федераци дунен тӀарча туристически оагӀонашка дукхагӀа дакъа лоацаш хилийта, культурни-гуманитарни бувзама боарам лакхбе, Белоруссецара Россе паччахьалкхен дӀа-хьа леладу гӀулакх кхы тӀа тоаде. Иштта вай мехко лаьрхӀад, лоалаха ядача моттигашца пайдане хургдола бувзамаш оттаде.