Россе унахцӀенонна тӀахьожам лоаттабара даькъ тӀа, ГӀалгӀайче дикагӀчарна юкъе я
ГӀалгӀайчен унахцӀенон министерствон чуйоагӀача юкъарча совета болх, унахцӀенон тӀахьожам лоаттабара даькъ тӀа Россе дикагӀчарех лоархӀаш ба, аьнна, белгалбаьб. Из хьакхайкадир «УнахцӀенонна тӀахьожам лоаттабара дикагӀа бола болх, мехка цу лостамагӀа дикагӀа йола говзал», аьнна, РФ юкъарча палате дӀахьош хиннача кхетачене.
Цига дакъа лоацаш хилар республикан Юкъарча палатан доакъашхой, ГӀалгӀай республикан унахцӀенон министерствон викал Угурчанаькъан Хади. Цох дийцар «Сердало» корреспондентага республикан унахцӀенон министерстве.
«Из кхетаче дӀахьош, доакъашхоша дийцар мехка бахархошта лорий новкъостал дӀакхачийтарах, лорий дарбан дикал лакхъярах дола дешаш. УнахцӀенон даькъ тӀа юкъарлоно тӀахьожам лоаттабар, иштта Российски Федераце юкъарча палатан новкъосталца цун таронаш йоаржаяр, дикагӀа дола балхаш юкъедоаладар керттерча декхарех хилар а дийцар цу кхетачене, яхаш, дувц хоамо.
