ГIалгIайчен Парламенте бюджетах, йоалах йолча комитета викала Дибаранаькъан Мухьмад-Сале кулгал а деш, вице-спикера Хашенаькъан Азас дакъа а лоацаш, яьржа совещани дIайихьар. Цига иштта, дакъалоацаш хилар: депутат Пхьарчанаькъан Мухьмад, Дальганаькъан Розат, Республика Кулгалхочун Администраце, Правительства проектни болх вIашагIболлара йолча Урхален кулгалхо Малсаганаькъан Бекхан. Мероприяти хетаяь яр, 2021-2022 шера, къаман проекташ маьхалъяхара, аьнна хоам бир, ГIалгIай республика Халкъа гуллама пресс-службе.

Из кхетаче дIахьош Добренаькъан Мухьмада белгалдир, кердача экономически хьалашка, республика бахархой вахара хьалаш тоадара къаман проект чIоагIа эшаш хилар а, из маьхал яккхара терко е езаш хилар а, цудухьа, къаьстта, цу деша ГIалгIай Республика Парламента комитеташа дукхагIа терко ю.

Малсаганаькъан Бекхана белгалдир, ГIалгIайче дакъалоацаш хилар 43 проект маьхал яккхара. ДукхагIча даькъе из дувзаденна да, унахцIенон, дешара оагIонаш дегIайоалаярца.

Россе Минфине, таханарча денна, республике къаман проекташ маьхалъяхара хьал, хьалхарча аргIах латташ да: «Дешар» республике гIолла — 5,8%, мехка гIолла-4.4%, «Кхерамзлен машений наькъаш» республике гIолла — 9,7%, мехка гIолла — 6,8%, «Халкъашта юкъера коопераце экспорт» республике гIолла — 29,8%, мехка гIолла — 5,6%.

2022 шера, регионе дешара кхуврчашка ремонт е лаьрхIад, иштта хьалъе лерхI спортивни майдаш, школашка спортклубаш.