Цу тайпара аргIанара вIашагIкхетар дIадихьар Назрановски районе. Цу юкъе дакъалоацаш хилар ГIалгIай Республика Халкъа Гуллама депутаташ, иштта Назрановски райсовета, Экажкъонгий-Юрта, ГIазе-коа, СурхотIа юртсовета депутаташ.

— Тахан вай парламенто тIаийца бола хIара соцам наьха хьашташ кхоачашдара лаьрхIа ба, — аьлар ше къамаьлдеш ГIалгIай Республика Халкъа Гуллама депутата ТIумхой Мухьмада. — ДукхагIча даькъе парламента болх тIатайжа ба социальни блок дегIайоалаяра, унахцIенон а дешара а хьалаш довзаш хилара оаха наьха хьашташ кхоачашдаьд. Белгалдаккха деза, эггара чIоагIагIа оаха терко тIайохийтар — из наха хьаде хIама хилийтар да. МоллагIа гIишло е кхыйола лоархIаме объект мара хьалъеш ца хиларах, хьалхарча аргIах латта декхар да вай бахархошта болх хилийтар. Цу хьакъехьа даьр а кIезига дац, массане а юкъарча хьинарца болх ца беш лаьтта предприятеш болх бе дIайолаяьй, керда инвестораш юкъебоалабаьб. Республика кулгалхочо, правительство, кхыйолча органаша тхо хьалалоац цу хьакъе.

ГIалгIай Республика Халкъа Гуллама депутаташ Хашенаькъан Азас, Хамхой Батыра дийцар Пригородни районера беха нах шоай хиннача фусамашка юха цIабахийтара бола болх мишта дIабихьаб, къамашта юкъера хьал аттача даккхара хаттараш а дийцар, бераш долча фусамий оагIув хьаллацара малагIа гIо даьд а дийцар.

«Единая Россия» парте депутаташа белгалдир эггара чIоагIагIа де вIаштIехьдаьннар матерински капитала программа дегIайоалаяр да аьнна. Из хинначул 200 эзар сом дукхагIа а, хьалха ца хиннача бесса хьалуш а да. Цхьан цIагIара вежарий-йижарий миччахьа мара уж бахаш ца хиларах берий беша е ишколе баха таро йолаш ба, цул совгIа цхьоалагIча сентябре денз берий даьй-ноаной таро хургъя берага хьожаш хиларах I00% больнични эца балха стаж яр-яцар аьнна доацаш.