Токмакски кхалерча коммунальщикашта машин елар «Ингушнефта» мехкдаьттахоша
Запорожски областа Токмакски кхален моттигашка болх дӏахьош боахкача вай мехкарча ЖКХ оагӏон болхлошта лаьрхӏа машин елар «Ингушнефта» АОс. Коммунальни оагӏонцара хатар хиннача моттиге ма хулла сихагӏа дӏакхача, болх дӏабахьа аттагӏа хургда цу наха кердача машинаца.
«2023-ча шера денз, Запорожски областа Токмакски кхален моттигий хьал меттадоаладара тӏехьа къахьегаш ба мехка. Цига бахача наха гӏо деш, хӏамаш кхухьийташ, цхьацца балхаш деш, оагӏув хьаллоац вай республико», - йоах «Сердалога» мехкарча Паччахьалкхено беча хоамо.
Машин укх деношка ӏокхоачаргья Токмакски кхале, хатараш хиннача моттигашка болх дӏахьош чӏоагӏа накъаяргья из.
Энергетиках, ЖКХ гӏулакхех йолча министерствон хьалха латтача Султиганаькъан ӏумара белгалдир, дехара жоп луш, «Ингушнефта» АОс машин ӏалашъярах дола гӏулакх цу сахьате хьаллаьцар.
