Халкъашта юкъерча кинокхетачене лоархӏаме моттиг дӏалоацаш хилар гӏалгӏай драма «Каьхат»
«Амурски гуйре» яхача кинон, театра Халкъашта юкъерча XXӏV фестивала чаккхенах дийцар Благовещенске. Российски 37 болх юкъе болаш, 18 паччахьалкхера 73 кинолента дар хьажархошка гойтараш, хӏаьта «полнометражни» оалача оагӏонцарча кинотоламга кхача гӏийртараш 10 фильм дар. Ӏамарханаькъан Амура «Каьхат» яха драма яр, цига дакъа лоацаш. Гӏалгӏай Паччахьалкхен бӏаь шу дизара хетабаь бар вай къаман студе дӏаязбаь из боккха болх.
«Бокъонца хинна хӏамаш чулоацаш дар кино. Керттера турпалхо – 1972-ча шера Брежнев Леонидага каьхат дӏадала къайлагӏа Москве йодаш йолча Нохч-Гӏалгӏайчен тоабан хьалхаваьнна къона хирург. Фестивала балхашка хьожараша «Каьхат» яхача кинон эггара дикагӏа сценарий оттаярах совгӏат делар. Кинокхетаче дӏакъовлаш хиннача моттиге режиссёр волча Ӏамарханаькъан Амурага дӏаделар из. Хьалха «Сайти – Зоуле воӏ» яха цун кино белгалдир Российски, иштта халкъашта юкъерча кинофестивалашка», - «Сердалога» из хоам кхаьчар вай мехкарча Паччахьалкхера.
«Амурски гуйре» яхача Халкъашта юкъерча киноккхетачене «Каьхат» яха кино белгалдар къаман истореца, культураца лоархӏаме, боккха никъ хьабеллаш да, аьнна. Вай мехка хала хинна ханаш йовзийташ, къаман ӏадаташца, доккхача истореца, оамалашца дувзаденнараш Российски, иштта доазал арахьарча хьажархошта хьалхашка хьаделлаш бола болх ба ала деза цох.
Иштта йоккхача, дукхача моттигаша дакъа лоацача яхьашка вай къаман вахарах дола кино хоастадар вай республикан хӏама лакха оттадар, цунца дувзаденнараш довза безам хилар да.
