Университета студенташта ӏаткъац бе-бе метташ, культураш хилар
Гӏалгӏай паччахьалкхен университета халкъашта юкъерча клуба доакъашхоша, цига дешаш болча кхыча мехкашкарча студенташца, Магасе гӏолла экскурси йир. ИнгГУ кагирхой политиках йолча проректора Оздой Л. тӏадилла дӏахьош болх бар из. Интерклуба кулгалду Оздой Хӏарон вар цу гӏулакха хьалхаэттар.
«Сердалога» бенача хоамах, Алане доазон тӏарча Барта Гӏалагара хьаболабенна, шахьара керттера моттигаш йовзаш хилар студенташ. Хӏиндечера баьхка, вай мехка дешаш болча студенташта дайзар къаман ӏадаташ, культура, истори.
Къаьстта тамаш еш бар уж, дунен эггара лакхагӏа йола музей лоархӏача Барта Гӏалах. Бӏаь метрага кхоачаш лакха йолча цун бухьера Магасага хьожаш, чубузаш латтача малхаца сурташ доахаш бар уж.
Беррига студенташ цхьанкхеташ, цаӏаш хинна дӏаотташ кхетаче хилар ала йиш я цох.
