Ерригача Россе яхьашка белгалваьлар Гӏалгӏай тохкамхо
Вай мехкарча Россе Тохкама Комитета тохкама моттиге геттара лоархӏаме долча гӏулакхашца болх дӏахьош вола воккхагӏа вола тохкамхо Именаькъан ӏийса белгалвеш, кхетаче хилар. «Кхело яздаьр – тохкамхо» яхача Ерригача Россе яхьашка хьалхабаьннарашта юкъе ва вай мехкахо. Цу юкъебахаб кхаь шерал дукхагӏа болх беш боаца тохкамхой.
«Вай мехкарча Россе Тохкама Комитета тохкама оагӏон хьалха латтача Асхабов Ахьмада РФ Тохкама Комитета диплом дӏаделар цунна, баркал оалаш. Шоай гӏулакх дика довзаш, декхараш бехктокхаме, лакхача говзалца кхоачашдеш бола къона тохкама болхлой гучабахара, белгалбара тӏехьа дӏахьош я уж яхьаш тахан», - дийцар «Сердалога» Тохкама Комитета зарбан болх лелабераша.
Иштта лоархӏаме, йоккха йолча яхьашка белгалвалар Именаькъан ӏийсайга кхаьчар ше хьатӏаийца болх тӏехдика дӏабахьа ловш хиларах, хьинаре къахьегарах. Бокъонаш лораяра гӏулакх боаггӏача боараме хьадахьаш хиннав вай мехкахо.
Цул совгӏа, хӏара денна ший говзал лакхъе хьожаш, ше дезаш хержа хӏама иштта дезаш дӏачакхдаккха гӏийртав из, хьалхарча дийнахьа денз. Хӏаьта из деррига ца зувш дисанзар хӏанз.
