Керда спектаклаш кийчъеш да берий театр
Тханарча дийнахьа, шин спектакла тIа къахьегаш ба берий театра актёраш. Киплинга даьча йоазонах йола «Маугли» яха спектакль оттаеш я театра керттера режиссёр йола Хазанаькъан Лейла.
Режиссёра Цхьорой Азамата кийчъеш латт Пхьилекъонгий Махьмад-СаIида берашта язъяьча пьесах йола «Мичига ловзараш» яха спектакль. Цхьаттара дIахьош латт спектаклаш тIара болх. Актёрашта йовхьамаш дIайийкъай, суртанчаш шоай даькъ тIара болх кийчбеш ба. «Сердало» газетага из хоам бир театра пресс-секретарь йолча ПхьаргIилганаькъан Марианнас.
«Маугли» яха спектакль эрсий меттала оттаергья. Цул совгIа, актёраша ловзаергьяраш теникаш яц, шоаш ловзаш хургба уж.
«Мичига ловзараш» берашта гургда наьна меттала. Йовхьамаш ловзаеш теникаш хургья.
«Де лаьрхIар хьалххе кхайкадеш оамал яц тха… Ха хьакхаьчача гургда вайна деррига. Хазанаькъан Лейлас аьнначох, «Маугли» укх наькъа ший тайпара, дукхагIа безам тIагIоргболаш хьокха лерхI», - аьлар Марианнас.
