Берий театро укх шерара ший болх чакхбаьккхар, Шолжа кхален ишколашка дахарца
Режиссёра Хазанаькъан Лейлас оттаяь «Йишилг АлЁнушка, вошилг Иванушка» яха спектакль гойтар Алхастерча ишколе. Берий театро ший аргӀанара шу чакхдаьккхар Шолжа кхален ишколашка, берий бешамашка гастролаш дӀахьош.
Укх бетта кхален массайолча юрташка чакхбаьлар уж, цу юкъе гаьнара юрташ а йолаш. Цунах дийцар «Сердало» корреспондентага театра зарбан болх лелабераша. «Массайолча дешара урхалленашка, тха спектаклаш боккхача безамца тӀаэцар.
Цхьайолча моттигашка нийслора цу тайпара гойтам берашта хьалхара гуш а. ХӀанззалца йолча хана, телевизорга гӀолла фаьлгаш мара ца гуш хиннача берашта, из боккха салоӀам бар.
ХӀаьта теникаш - из кхыдар да. Белгалдаккха деза, Алхастерча ишколе тхо хьалхара даха дацар. Театра актёраш укхаза хиннабар «Тамашийна кий» яха спектакль гойташ, из чӀоагӀа езаеннаяр хьажархошта. ХӀанз цу тӀехьа тха болх чакхбоал, укх бетта кхы хӀаманга даха ца дезаш болх йистебаьлар», - аьлар театра зарбан болх лелабеча ПаргӀаланаькъан Марианнас.
