Эггара шийлагӀа долча цӀайзача Ӏан замах кӀай кхоллар кхелла латтача гаьнашта а бӀарахьежа дог доагӀаш хул, шийла яр аьнна доацаш, хӀана аьлча иштта я из Ӏалама хозал, цох тамаш елга а да. Цул совгӀа, Ӏан замах гонахьара фо а цӀена хул. Бакъда из деррига вайна Дала хьаденнилга дика кхета ца деш, цунна боагӀаш бола мах оттабе ца ловш, из ийрчадоахараш а кӀезига бац. Цунца дувзаденна цхьа масала доаладе ловргдар сона.

Со, балха хьайоагӀаш, дӀаувтташ йола моттиг ший тайпара хоза гаьнаш ягӀаш; цӀена, даим Ӏай а аьхки а баьццара бай тӀабаьнна баь чӀегилг а йолаш, лаьрххӀа хозалла цхьанне хьабена Ӏобилла цхьа боккха кхертӀо а уллаш, кхыметтел гаьнах моллагӀча сага бебоалла мухь хьалъолла йиш йолаш, боккха хьастам а теха, тоаяь моттиг я из. Аз а, хийла тхоаш балха кхувлаш йолча транспортага хьежаш, сай тӀормиг а хьалъолл цох. Лорадеш хилча хоза ма дий моллагӀа дола хӀама. Бакъда лора-м дац. Каст-каста нувхаш Ӏокхувсаш, ийрчайоаккх из моттиг. Тахан чӀоагӀа дог деха цу моттиге Ӏокхийсача нувхашта бӀарахьежаш, лаьттар со. БӀарг ма кхоачча яда чоалпаш чухинна каьхата кӀопилгаш, мерза хиш менна доассадаь кӀингаш, зӀамига шушаш, боккъонца дола да воацача коара сурт да цига доаллар.

Гаьнашта юкъегӀолла хоза Ӏодилла асфальта наькъа такилг нувхаш хьалдизад. Малав-хьогӀ цох жоп дала дезар? Саг ше веций из нийса доацилга кхетаде декхарийла вар? ХӀанз-м кхы тамаш елга доацаш, гаьна ваха ца везаш, дӀа-юха мел хьежача нувхаш чутувса аьшкан яьшкаш ма латтий вайна, кӀеззига дӀахо а ваьнна, шоаш хила йоагӀача дӀакховса мегаций уж?

ХӀара сага ший сакхетам ца хуле, дийцад аьнна тоалургдолаш дац из. ЗӀамига волча хана денз, сага дӀалуш бола хьехам цӀенонца дувзаденна дош юкъелоацаш хила беза. Сага керттера эздела оагӀув я из. Из юкъера дӀаяьккхача, сагацара хоза оамал а дӀайоал. Цудухьа водар, дикадар хьалхадоаккхаш; лерттӀа кхетам луш, вай дезал ца кхебой; уж мо йола моттигаш совъювлаш хургья вайна юкъе. ТӀаккха, Ӏалам бехдарал совгӀа, вай эздела юкъера дӀайоаккха хозагӀа йола оагӀув хургья из.