Журнала кердача номера юкъедахад Коазой Ӏийсас яздаь «Машай контракт» яха дувцар. Вай заман «гӀалгӀай», саг йоалаяр-йигар дика гойташ да цу тӀа. Ӏодешаш беламе дале а, вай къаман кхоаненах саготдайташ да халкъа йоазанхочун дувцар. Цу жанре даь да Шаденаькъан Султана, Аланхой Тимура, Баркинхой Залинай, Малсаганаькъан Нурдина, Хамхой Дауда, Гоамботанаькъан Бориса йоазош а.

ГӀалгӀай Республикан 30 шу дизара хетадаь да Бераханаькъан Жабраила, Дударанаькъан Урусхана, МутаӀаланаькъан Хьажбикара, Пхьилекъонгий Амира, Угурчанаькъан Азмат-Гире, Хьоашаланаькъан Ӏаьлий, Янданаькъан Жамалдий поэтически йоазош. Геттара дика хургдар, нагахьа санна къаьна, дуккхаза кепа йийтта йоазош а доацаш, керда, хӀанзалца дешанза дола йоазош уж даларе.

Иштта журнала тӀара довза йиш хургья зӀамагӀдолча ноахалий йоазанхой кхолламаш а: Оалмазанаькъан Марема, Жандиганаькъан Хьанифай, Дударанаькъан Маккий, Кхузнаькъан Ингай, Махлой Рукъета, Мерешков Султана, Таймасханаькъан Лейлай, кхычар.

Бераша даь йоазош а юкъедихьад журнала укх номерá, бакъда уж цу тӀа товш дац аьнна хеталу, хӀана аьлча вай республике арадувлаш да «СелаӀад» яха берий журнал, цу тӀа кепа техача нийсагӀа хургдар цу тайпарча йоазошта. Иштта товш дац укх тӀа гӀалгӀай алфавит, вай каьхата мотт хьахинна 100 шу дуз массехк бутт баьлча, хӀанз а алфавит Ӏомаде дезаш дале, къадолаш къам да вайдар. Укх тайпарча цӀенхаштача журналага товш яц «Ховргдий шоана жоп дала?», «Нийса язде вай гӀалгӀай меттала» яха рубрикаш.

ТӀехьа тӀайоагӀа номераш кӀезигагӀа гӀалаташ долаш, кӀоаргагӀа чулоацам боалаш, керда йоазош дукхагӀа долаш хилча дика хетаргдар.