«Даьхен оаз» екаргья кастта
Байташ ешарий яхь дӀаяхьа лерхӀ вайцига
Чиллан бутт чакхбалале вай республике дӀаяхьа лерхӀ, «Даьхен оаз» яха ишколашка деша дагӀача берашта юкъера байташ дикагӀа ешарий яхь. Из дӀаяхьа дагадехар я «Ингкино» яха OOO, ГӀалгӀай республикан дешареи Ӏалмани Министерство. Яхье дакъа лоацаш хургда шин тоабанна чудоагӀаш дола бераш. Хьалхарча тоабанна юкъегӀоргба 5-7 классашка дешаш бараш, шоллагӀа тоаба латтаргья 8-10 классашка дешарех. Массехк бӀал хургба ювцача яхьа: кийчон, ишколера, муниципальни, мехкара. Хьалхарча бӀале толаш хиннараш гӀоргба шоллагӀча бӀала юкъе дакъа лаца, цига котбаьннараш къовсалургба мехко чакхйоаккхача яхье. Из хургья Магасерча №2 йолча ГБОУ.
Цига дакъа лоацача дешархой бокъо я гӀалгӀай меттала язъяь шоашта хозагӀа хета байташ еша. Белггалара декхараш латт яхьа хьалха: цкъа-дале, гӀалгӀай мотт дешархошта юкъе боаржабар, чӀоагӀбар; шозлагӀа-дале, къаман йоазонхой царна бовзийтар; хоза деша Ӏомабар; дувца къамаьл дегӀакхувлар; кхозлагӀа-дале, берий поэзенцара безам совбаккхар, цар начӀал дегӀакхувлар, библиотекаех пайда эца Ӏомабар, Ӏоаяь поалхам дӀа-хьа екъийтар, иштта кхыдараш.
ДикагӀбараш белгалбахара хержа кхелахой хургба, царца хургба йоазонхой, актёраш, режиссёраш, литература тохкараш, юкъара болх лелабераш, культуран а искусствай а болхлой, ГӀалгӀай республикан дешареи Ӏилмани Министерствон викалаш.
Яхье котбаьннарашта дипломаш, мах бола совгӀаташ лургда. Цу моттигаца дувзаденна хаттараш долча наха телефон тоха мегаргья укх номерах: 8967 123 06 06; язде йиш я укх maqa2maqas@vandex.ru электронни адресах.
