Дукха нах гулбаь пьеса
«Беке къонгашта» инсценировка яь 40 шу дизад
Гӏалгӏай драматически театра дукхача спектаклашка хьийжав со Шолжа-Гӏалий тӏа а Наьсаре а, бакъда Боканаькъан Ахьмада «Беке къонгаш» яхача романах оттаяьча «Цӏий кхайк» яхача спектакло миссел нах гулбаь байнабац сона цзхьанне а. Укх шера саькура бетта нийсса 40 шу дизад из моттиг хинна. Шолжа-Гӏалий тӏарча Наурадиловгӏар Х. цӏерагӏча Нхоч-Гӏалгӏай драматически театре гойташ яр из спектакль. Массе тайпа ханаш йолча нахах хьалйиза яр зал, цига миссел зизаш а го дийзадац, цига дийттараш миссел тӏоараш а хаза дийзадац.
Режиссёра Беканаькъан Мустафас инсценировка яь, оттаяьр из пьеса. Цу тӏа ше къахьегаш волча хана, сона а тӏабиллабар режиссёра цхьа болх-спектаклага илли яздар. Цу тайпара болх аз цӏаккха баьбацар; цудухьа, сай хур даь, юхагӏертавар со, амма режиссёр из илли алхха сога яздайта лаьрхӏа вар. Яздир аз илли («Лаьтта-нана»), из дийкар пьеса чакхъялале массехказа.
Романа автора Боканаькъан Ахьмада а цунга хьажа мел баьхкача наха а езаеннаяр пьеса. Цунна юкъе ловзаш бар гӏалгӏай дикагӏа бола актёраш Новрбенаькъан Руслан, Беканаькъанн Ибрахӏим, Зангенаькъан Руслан, Булгучанаькъан Хьажбикар, Коазой ӏайшет, кхыбараш.
