Дешара хьалхарча дийнахьа ишколан коа вӀашагӀкхийтар дукха нах: дешархой, хьехархой, дай-ноаной, хьаьший. Цу цӀайна хетаяь кхетаче дӀаяхьар дӀадоладир Россе а ГӀалгӀай Республикан а керттерча иллешка – гимнашка ладувгӀарца, цул тӀехьагӀа дикагӀа болча дешархошка айяйтар мехка байракх, цу тайпара бокъо укхаза еннаяр 8 «а» классе дешаш волча Булгучанаькъан Ӏусманаи 7 «а» классерча Муцолганаькъан Ясминайнеи. Цул тӀехьагӀа бераш кердача дешара шерца даькъаладувцаш, царна цхьацца хьехамаш деш, къамаьл дир ишкола директора Хидренаькъан Мухтара Любас, хьехархочо Овшанаькъан Ахьмада Аьсета, дешархой ноаноша Оалхазаранаькъан Марема, Овшанаькъан Мадинас, кхетачен хьаьша волча Наьсарен кхален прокурора заместитела Муцолганаькъан Мухажара Мурада. Дешархоша шоай говзал гойтар халхарашца, иллешца. Юххера а, бийкар хьалхара гургал. Из тоха бокъо еннаяр 9-ча классе ягӀача Эсмарзанаькъан Тамарайнеи 2-ча классе вагӀача Овшанаькъан ИбрахӀимаи. Бераш шоай хьехархошца классашка чудахар, дешара цӀайца ювзаенна ши урок хилар цар цу дийнахьа: «Денала урок», «Машара урок».

Укх шера вай ювцача ишколе деша Ӏохайра 476 бер. ЦхьоалагӀча классагара ийслагӀча классага кхаччалца, шишша класс хургья укхаза дешаш, вешта аьлча, уж ерригаш я 18 класс. Хьалха шин сменах а халла мара Ӏоховшалуцар ООШ ухаш дола бераш, моттигаш цатаар бахьан долаш. Укх шера тӀеххьарча 40 шера эггара хьалха дешаргда цига цхьа смена йолаш, ерригача классашкара массайола урок делкъа хана чакхъяьнна хургья.

Цхьацца керда хӀамаш а юкъедоаладаьд укхаза укх шера. Царех да «Кхерамзлен бухи Даьхе лораяри» яха Ӏилма. Хьалха хиннача технологена меттел, къахьегама урокаш хургья. Юртарча ишколе берашта хьехаш хургба лакхара дешараш дийша, паччахьалкхен сийдола цӀераш енна хьехархой. Берий хьашташ кхоачашдеш хургья йоккха спортивни, актови залаш, библиотека, столови, цӀенача, хозача мебелаца кийчъяь сийрда а паргӀата а классаш, тайп-тайпара гӀирсаш, йӀайхача хана ара ловза йиш йола майдаш. Дешархошкара эшар цаӀ мара дац – дешар, дешар, дешар. Аьттув болаш хилда хьо, дешара керда шу!