– ХьатӀадоагӀача шера сона хилча бакъахьа хетача хӀамаех дувце, эггара хьалха Палестинера тӀом чакхбалар дезар сона. Цига гунахьа доацаш дола бераш, маьрша нах боабар дилла моттиг йоацаш хала да. Фу бехк ба зӀамигача, хӀанз а вахар, дуне довзанза долча берий? Цу мехкара нах дерригача дунен тӀагӀолла дӀабаьржаб. ЦӀенах, мехках вохар хала хӀама да. Дагадоха мара дезац, мишта лийннаб мехкахбаьха хинна вай дай. Ираза, хӀанз кхыйола зама я, Палестинерча наха гӀо деш ба беррига бусалба нах, уж ара а меца а бутаргбац. Сона дика хетар, тӀом цхьаннахьа ца хилча. Укринерча тӀемо а дукха кагий нах боабаьб, къаьстта хала да Россе Турпалаш Боканаькъан Мустафа, Хамхой Адам вайна юкъе цахилар. Миччахьа бале а, тӀом – из тӀом ба. Цо нахах къахетам биц, къизал гойт. Цудухьа хьатӀдоагӀача кердача шера цу тайпара къизалаш дунен цхьанна а миӀинге ца хилча бакъахьа хетар.

Крдача шера, наха юкъе шерра даьржа унаш а лаьгӀделча дика хетаргдар. ТӀаккха байнараш кӀезигагӀа а болаш, дийнабараш дукхагӀа хургбар. Вайна ховш ма дий, мел нах бихьар керда даьннача лазаро массехк шу хьалха. Цу тайпара хало кхы цӀаккха ма йоагӀийла вай мехкага а къаманга а.

ТӀадоагӀа шу беркате хилча а дика хетаргдар сона. ДӀадийнар дика дебарга, мехка шортта ялат хиларга; жа, доахан, кхыдола хьайбаш дукхагӀа хиларга хьежжа, наьха вахар, унахцӀено тоалаургья. Вай мохк дӀахо дӀайодача хана а, чӀоагӀлуш, тоалуш, бӀаьхийгӀа хулаш дӀабаха беза.

Кердача шерара мархий бутт а хоза чакхбаьлча, мархаш дастара юкъе дукхача наха дакъа лаьцача, дика хетаргдар. Бусалба наьха керттера цӀай ма дий из.

Дешара хьакъехьа а ца аьлча далац. ВорхӀлагӀа класс толамца чакх а яьккха, аргӀанарча бархӀлагӀча классе се дӀачуяьлча, тоам хургбар сона. Из дуккхача даькъе са-сай кара да. Аз дика дийшача, хургдолаш хӀама да из. Кердача шера кхы а дукхагӀа къахьегаргда, аьнна, хет сона айса, дагалатташ йола из уйла кхоачашъе.