Кердача ишколага хьожаш, цох шоашта хетар оалаш, чакхбаьлар хьаьший. Уж хьежар классашка, спортивни залага, музейга, библиотекага; къамаьл хилар ишкола кулгалхошца а хьехархошца а.

ТӀеххьара вӀашагӀкхетар хилар йоккхача, паргӀатача актови зале. Цига къамаьл деш, республикан кулгалхочо Келаматанаькъан Махьмуд-Ӏаьлас дийцар, вай мехкарча президента а паччахьалкхено а наьха чӀоагӀа йоакхо еш хиларах, тӀехьарча хана духхьал вай республике хьайийллай 40 ишкол, 38 берий беш. Цу лостамагӀа бола болх дӀахо а дӀахьош ба. Цул совгӀа, цо белгалдир Путин Владимир президенталла юхахоржача вай республикерча бахархоша а шоай дакъа юкъедихьа хилар, кхадж мел тессачарна доккха баркал а аьлар цо.

ДӀахо Мехкадас белаглдаьккхар СурхотӀе дуккха цӀихеза нах хьабаьнна а къаьнара а юрт хилар. Керда ишкол хьаелларца даькъалабийцар цо зал йизза багӀа дешархой, къаьстта а белгалдаьккхар гӀалгӀай мотт Ӏомабе безилга; хӀана аьлча из я вай къаман керттера белгало. Ишкол хьаелларца дувзаденна, цун дӀоагӀа республикан Кулгалхочо дӀаделар къаьнагӀа йолча хьехархочунга Исмейланаькъан Макшарипа Сацитайга. Хьаьший а гулбенна нах а дукха доккха доацача концертага хьежар.

ДӀахо дӀайодача хана, Сурхо тӀарча ООШ деша дагӀача берий таро хургья, биззача боараме мел эша хьалаш а долаш, тайп-тайпара Ӏилмаш карадерзаде. Цар гӀулакха болх беш хургба дуккхача шерашка къахьегаш хьабаьхка, йоккха поалхам йола хьехархой; бӀайха, чам бола кхача кийчбеш бола столовен болхлой; йоккхача, паргӀатача фусаме дӀанийсъенна библиотека, спортаца дувзаденна хьашташ кхоачашде йиш йола зал, хӀанзарчоа уйча дӀанийсъяь музей. ТӀеххьарчун ший къаьстта цӀа хила деза, аьнна, белгалдаьккхар Макшарипа Махьмуд-Ӏаьлас.

Хоза цӀай хилар керда ишкол хьаелларах берашта а боккхагӀчарна а.