ГӀадйода со, боарам боацаш, хӀана аьлча къахетаме хилар, вӀалла хьайна малашб ца хойя а, хьайна уллуврча бусалба наьха хьал довза хьожаш, халача хьале волчун хьал аттагӀа де гӀерташ хилар, мискагӀа волчунца къахетаме хилар, Даьла духье лораяр да!

Алал, фу хургда укх дунен тӀа мискача, дог ийшача сага дог хьастарал, цун цхьа кӀеззига баь а тоам барал доккхагӀа, дезагӀа?!

Вай Кхеллача Дала вайна тӀадилла декхар ма дий из, вӀаший къахетаме, Ӏимерза долаш чакхдовлар!

Вай дино хьа а йоах, ишттача нигатаца даь дика дов йиш йолаш дац, мисхал зиртилг миссел мара из деце а. Дуккха а доккхагӀа долча дикашца бекхам баь, Дала вайна духьала дахь Ший духьа доаржадаь дика. Из да-кх дийца варгвоаца ираз!

ЧӀоагӀа дог айдаьд са цхьан беркатеча дезала даьча гӀулакхо. Дикка ха я тхо вӀаший бувзам лелабеш хьадоагӀа. Цхьа беркате цӀен-даи цӀен-нани да уж. Иштта хоза, сийдола, эздий оамалаш Ӏомаеш, яхь йола гӀулакхаш хьалхадоахаш, кхебеш латт цар шоай дезал а. Дкха ха йоацаш, шоай вахаре нийсденначох дийцар цу фусамерча кхалсага: «Базар тӀа вахача са цӀен-дас зийра; пхи кийла чуйода шекара гали, чай эца гӀерташ, дагарде эттача цох дӀадала деза ахча ца тоъаш; йиса ха яха йоккха саг.

Мискинг, эхь хеташ хьайзай из, шийна ахча ца теача. Шекара гали, чай, хьоар, тайп-тайпара, цо юаргья аьнна шийна мел хийтта, хӀама Ӏочуелла; ахча дӀаденнад цо. ЧӀоагӀа корзагӀъяьнна, ма дохка хьай ахча, яхаш, хьийза йоккха саг машина чу хьачухоаяь, цун яха еззача Ӏояьккхай. Ийца хӀамаш дӀачухьош, цӀагӀа ер чуваьлча; кхалсага кулг эшаш латта хоза дикка ха йолаш хиннад цӀагӀара хьал.

Йоккха саг йоалаеш ӀочувоагӀаш, техкад цо из малий, хьанца яхаш я. ЦаӀ мара воаца воӀ, дукха хана денз, ший дезалца кхыча паччахьа кара ваха дӀаваха, шера цкъа мара уж бӀарга ца гуш, цхьаь яхаш хиннай из миска. ЧугӀолла дӀа-хьа хьежа, йоккхача сагага хӀама ца оалаш араваьнна, чехкка хьеи воккхагӀа вола ши кӀаьнки дӀакийчлел, аьнна, телефон хьатехар цӀагӀа.

Цига лостам беш мел эша хӀама аз хьаийцар; гон, диг, хьастамаш, кхыйола хӀамаш цӀен-дас гулъяь, арадаьлар тхо. 12 доаллаш дӀадаха, из бӀарчча ди сайранга кхаччалца цига дӀадихьар оаха.

Корагара кӀадаш, кисе хӀамаш, кхыйола ютташ мел йола хӀамаш йитта, аьшк теха дӀанийсъяь, цӀагӀа мел йола моттиг йила, лостам баь Ӏооттайир.

ЦӀен-дас еха, мух чухьекхаш лаьтта ниӀ тоайир, кораш чӀоагӀдир. Шин кӀаьнкаца коа баьхкар, эшаш мел йоаца хӀамаш, нувхаш йоагаеш, наӀартӀе цхьалхайоаккхаш.

ЛаьгӀо мара йоагаш йоацача пешкага хьежа, цун дӀадикъа латта оала хьауха Ӏургаш мукъадаьха, из тоайир.

Йоккха юкъ ялалехь, «хах», аьнна, дӀохаделар низткъа мара хьал ца йоагаш лаьттача пешка йӀовхал ца тоъаш лаьтта цӀа. Ва ма чӀоагӀа гӀадъяхар из миска йоккха саг!

Сай цӀагӀара дӀабихьа, деррига цӀа дӀалоацаш бола боккха кӀувс Ӏобиллар аз из южаш йолча моттиге; когашта йӀайхагӀа, бӀаргашта безамегӀа хургья хьона, аьнна.

Тишъеннача цхьайолча пхьегӀашта меттел, керда пхьегӀаш оттайир. Боад отталца даьхка, цӀагӀа, коа дика лостам бе аьттув баьлар тха. Вахача са цӀен-дас, кхача кийчбеча моттигера, массехк тайпара дӀайха даар дера йоккхача сага.

Цун телефона номер хьаийца, кӀира цкъазза пӀаьраска дийнахьа из йолча юхаухаш, цӀагӀа лостам бергболаш чӀоагӀо яь, чудаьхкар тхо.

Дукха ха яр со йоккхача сагах хьегаш яха, хӀанз корайир-кх сона из. Ма чӀоагӀа из гӀулакх дезаденна чудаьхкар тха бераш! Каст-каста юхаухаргдий вай цунна новкъостал де, яхаш, сагота бар.

Ма чӀоагӀа раьза я со из де тхоай аьттув хинна!» - яхаш, из йоккха саг йийца яла ца могаш, яр са новкъост.

ВӀалла хала а доацаш, ма боккха маьл баккха йиш йолаш да вай укх дунен тӀа. Тахан вай хьадаьр, кхоана Дала вайна бӀаргадайтаргдолаш да-кх. Ма доккха ираз да-кх дог ийшачун дог хьаста аьттуви низи хилар!

Хеталу, ма хоза беркат доалл са къамах. Беркат деций, доккха беркат, иштта дегаш, сакхетам бола бусалба нах вайна юкъе хилар?!

Дала эша ма болба адамашта гӀо деш бола, къахетаме дегаш кхедеш бола нах. Эзараш болба Дала ишттачарех!

Дуккхача хӀамай уйла яйта хургья, аьнна хет сона, шуга укх дувцаро. Уйла нийса е сакхетам бенначоа, уйла е хӀамаш дукха-м да вайна гонахьа.