Иштта дика болча хьехархоша нийса никъ хьеха ираз хилар са а. Аз дешаш хиннача МагIалбикерча 18-ча ишколе уж дукха бар. Цхьа хоза, беркате тоаба яр из - бизза гIалгIай яхь йола къонахий, сувнаш ба ала йиш йола дика кхалнах! Кусенаькъан Халита Бахьаудин цу эздийча тоабан юкъе йизза моттиг дIалоацаш, хьалхале лелаеш вар. Хьакималга кхача хьашт долаш, лакхаленашка сатувсаш саг вацар из, ший болх геттара боча бола хьехархо вар, ше хержа никъ нийса лелабаь саг. Дала хоза куц денна, тоавенна дIаэттача зIамигача сагага хоза товра из атта боаца болх.

ДIадахача бIаьшерен кховзткъа иттлагIа шераш дар уж… Цхьаккха тIехдаьнна хIама доацаш, духхьал мели язду улги мара хIама доацаш, гIалгIай мотт хьехаш хинна ханаш яр уж. Наьна меттацара гIулакх цхьа моллагIча тайпара ца хьош, хьехархочо ше хьатIаийца никъ мел чоалхане ба кхетадеш, яхь йолаш дIадахьа деза, яхаш, дIахьора цо ший болх. Доккха беркат хьадаьлар цу сагах иштта хьинаре, ший гIулакх боча долаш къахьегарах.

Тахан из хьагойт дуккхача наьха дегашка яха йисача цун цIеро. ЦIаккха а вицлургварех вац из саг! Цо хьийхараш, цунгара хьаькъал ийцараш тахан кIезига бац… Хозача дешаца дагалувц цар из каст-каста. Царна юкъе я со а, наьна мотт хьехаш йола хьехархо. Бахьаудин вар сона из никъ маьршабаьккхар, чам чуболлийтар.

Цо сайна мел Iомадаьр боча долаш лорадеш, массахана дагалоаттадеш, хьайоагIа со. Иштта никъ хьабахьараш дуккха а ба, Даьла къахетамца! Хала да дега хьоцара къастар, бакъда, массавола саг цхьа ха йолаш ва укх дунен тIа. Аз доаккхал ду из саг сайна вовзарах, хьамсарча ишколан исторе цо ший цIена лар йитарах, дуккха дикаш цунгара Iомаде сай аьттув хиларах. ГIалгIай эздий къонах волаш, чакхбаьккхар цо ший никъ!

Дала гешт долда цунна, ялсмален хьаьша волва цох Кхеллачо! Цу халонна сатоха низ лулба юхебисарашта!

Циздой Салмана йоI Мадина,

МагIалбикерча № 18 йолча ишкола хьехархо