Наьна метта хьакъехьа дийцар лоархӀамеча кхетаче
Болх беш хургья паччахьалкхен комисси
ДӀадахача ерача дийнахьа, ГӀалгӀай Республикан Паччахьалкхен цӀагӀа хилар гӀалгӀай метта хьакъехьа дувцаш йола кхетаче. Из дӀайихьар яр паччахьалкхен кулгалхочун заместитель йола Саганаькъан Индира. ВӀашагӀкхетара юкъе дакъа лоацаш бар мехкадаь администраце юридически даькъа, къаман политиках йолча министерствон, дешара министерствон викалаш, журналисташ, йоазонхой, кепайоазон болхлой, хьехархой, кхыбараш.
Кхетаче дийцар таханарча гӀалгӀай метта хьалах, из тоалургболаш де дезарех, цхьаццаболча таржамхоша деча гӀалатех, ишколашка Ӏомадеш долча меттах долча книжкай дикалах а кхоачамбоацарех а.
Хьалха вай республике болх беш хиннай меттаца ювзаенна тайп-тайпара комиссеш. Масала, царех яр терминашца ювзаенна, орфографе тӀа болх бу, дешара книжкаш тоаду, иштта кхыйола комиссеш. Кхетаче белгалдаьккхар вай республиканна цхьа комисси хилча а кхоачам хилар, бакъда из хьажа еза меттаца дувзаденна мел долча хӀаманга. Из декхарийла хургья книжкаш тоаде, орфографена юкъе хувцамаш де, тайп-тайпара дешаш юкъекхахьарга хьажа. Цу гӀулакха вӀашагӀъеллар паччахьалкхено хьалхале лелаергйола юкъара цхьа комисси. Цунна юкъеяхар Ӏилмани дешареи министра заместитель Угурчанаькъан ПаьтӀамат, цу министерствон отдела кулгалхо Кокурхой Мадина, къаман политиках волча министра заместитель Пхьаранаькъан Асхьаб, «Сердало» яхача кепайоазон цӀен директор Курскенаькъан Хадижат, шеф-редактор Курскенаькъан ИбрахӀим, директора заместитель Ӏарчакханаькъан Сали, ший доалахьарча книжни издательствон директор МургӀустанаькъан Мухьмад, хьехархой ИПК болхлой Овшанаькъан Мареми Гаьгенаькъан Къурейши, йоазанхой цхьанкхетара хьаким Ноакастхой Хаваш, хьехархо Кхоартой Ӏашат, кхыбараш.
