Дукха ха йоацаш, кердача хьисапе арадаьннача журнала 4 номер кхаьчай вай республикерча дешархошка, из хьаяздаьча берий бешамашка, белггаларча нахага. 2000 гаргга волча сага таро хургья цар оагӀош тӀа кепа теха, наьна меттала язъяь боккхагӀболча йоазонхой а берий шоай а байташ еша. Царна юкъе да Хьоашаланаькъан Ӏаьлас, ГӀазданаькъан Аьсета, Хамхой Дауда, Албохчанаькъан Зейнапа, Дударанаькъан Маккас, Кхоартой Марета, кхычар даь йоазош. Иштта къонача дешархой таро хургья Ӏахилганаькъан Заретай, Мерешканаькъан Султана, Доврбиканаькъан Розай дувцараш деша. Журнало довзийтаргда Эзопа кӀоанолгашта даь керда таржамаш, тайп-тайпара фаьлгаш, кроссвордаш. «ГӀалгӀай сийдола нах» яхача оагӀон тӀара цар ешаргья, къаман гӀулакха баха гӀерташ, къахьегаш чакхбаьннача нахах: Чахкенаькъан Ахьмада Баширах, Доданаькъан Митакха Ӏамар-Ӏаьлах, Даканаькъан Ахьмада Мухьмадах, Дидиганаькъан Бексолта Борисах - йола очеркаш. Берашта къаьстта дезалургда аьнна хет сона Шаповалов Владислава байташта даь таржамаш, БӀарахой Ӏаддал-Хьамида, Маматанаькъан Марета, гӀуозлой къаман фаьлгаш.

Мотт Ӏомабеча а шаьрбеча а даькъе дикка гӀо дергда журнала кердача номераша, цу гӀулакха юкъеденад дошлорг, къаьнара, дицденна е дицлуш латта дешаш довзийташ йола «Мотт беце, къам а дац» яха оагӀув.

Дукхача, хозача, безам тӀагӀоргболча сурташца кийчдаь да керда журналаш, из болх баьб говзача суртанчас ГӀудантанаькъан Дукхеша, цул совгӀа бераша шоаш даьхка сурташ а го йиш я журнала тӀа. Лоацца аьлча, дуккхача наха къахьийгад кхувш боагӀарашта наьна мотт дикагӀча оагӀорахьара бовзийта гӀерташ. Берий декхар – дешар, хӀама Ӏомадар, «СелаӀада» вахаре дакъа лацар. ХӀанз моллагӀа бер да, ший цӀагӀа даггӀашехь, цун редакцеца бувзам оттабе йиш йолаш. Интернета гӀонца, шоаш кхелла моллагӀа йоазув, сурт, кроссворд, кхыдола кхолламаш хьадайта йиш я. Сайт дӀаязъяь я журнала 16-ча оагӀон тӀа.