Магасера «санитараш»
Циский вахарах лаьца
Со Магасе ваха венача хана, сона гонахьа лакха йоархӏ мара хӏама дацар. Бакъда цискаш-м каст-каста гора. Аз тамаш еш дар цхьа хӏама, фу дуаш лел уж укх баьцашта, йоархӏашта юкъе. Цул совгӏа, майра а деций, сага лаккхал йолча царна юкъе лела. Акха цискаш хьахинна дала доахкар царех, сагаца дукха хьоашал долаш, цох хьаувш дацар. Нах бӏаргабайча, дайде къайладоалар. Каста сай коа чууха цискаш зе ваьлар со. Царех циск меттагӏ ца доалаш, йӏаьххача хана латташ хулар кӏийленна этта, тата дужадаь; тӏаккха цӏаьхха тӏакхийте шолкъа е дахка лоацар, шоашта кӏалбусаш хуле. Цкъаза гаьна доацача, нах бахаш доацача коашкара арадоагӏаш хулар царех циск, багайоаллаш йоккха эп йолаш.
Бус юкъе цӏе цӏогӏа доалар хийла цискага. Цох фу аргда ца ховш вусар со хийла. Хетаргахьа, эпаца е цицхолгаца леташ да аьнна хеталора сона царех циск. Бакъда кастта гучаяьлар цун къайле а, цискаш санна бийсан «чарахьал» де арайоал зӏийнаш а. Уж Магасе хӏанз а йолаш я. Циск, йоагӏар цицхолг е эп я мотташ, баьдеча гӏолла цунна тӏакхет. Иштта хьахулаш дола цӏогӏа дар сона бийсан хозаш хиннар. Зӏийна тӏакхийтача, цун маьхаша лоза ма йой бат, цӏогӏа ца техача кхы де хӏама дисац царна.
Магас, сога хаьттача, дуккхача ца эшача дийнатех ӏоцӏенъяьй мекхаш долча «санитараша». Хӏанз, дуккха нах баха хьалчубаьхкачул тӏехьагӏа, нахаца хьаийнад уж, хӏана аьлча бераша а боккхийчар а каст-каста даар увттаду царна, лаьрххӏа цискашта хьадаь. Коа чудеча йӏайхача хана царна хий оттаде, безалургбола кхача бола хьож шоай фусамашка баха нах а. Хӏаьта шолкъаш-м, цхьайолча хана сага тетте тӏайоагӏа, цисках кӏалхаръяха тхо яхаш санна. Бегаш а боацаш, бакъдолаш да аз яхар. Сох дӏа ца а йодаш, сайгахьа уж хьаудаш яйна ва со хийла.
Магасера цискаш хӏанз говза ӏемад, нах дукхагӏа лелача аллеяшка мара совцац уж, цига корайоагӏа царна бат хьаьнлургйола хӏама. Царна кхача телача наха кхыча дийнаташта а гӏулакх ду, цискаша дуаргдоацаш кӏалхардоах цар уж. Лаьрххӏа шоашта хьадаь даар латташ хилча, шолкъашта е зӏийнашта тӏакхувсадала ловш хилац уж.
