Цхьан сурта истори
20 шу хьалха денна совгIат
Черепков Виктор Ивановича цIи дика йовзаш я вай мехка. Из ювзаенна я «Кортамукъалеи халкъа Iаьдали» яхача политически партеца, депутата балхаца, Паччахьалкхен Думан кхерамзленах йолча комитетаца. Цул совгIа, Виктор Иванович РФ гIорваьнна рационализатор, СССР говзанча (изобретатель), Iилма-технически кхоллама лауреат ва. Цунна денна хиннад «Дошо кулгаш» яха диплом а цу тайпара цIи а. Иштта Черепков белгалваьккха хиннав «Изобретательствони рационализацеи говзанч» яхача цIерца. Цунна денна хиннад паччахьалкхен тайп-тайпара совгIаташ. 1994 шера Приморски крае шера дикагIвола саг ва аьнна, белгалваьккха хиннав из.
Виктор Иванович 1-ча рангах вола форда-флота капитан ва, эпсара сий лакха лоаттадеш чакх а ваьннав. ГIалгIай мехкарча нахаца бувзам болаш а, вай мехка вена а хиннав из. Паччахьалкхен Думан депутат волаш, цун гIонча волаш болх баьб Iарчакханаькъан Мухьмада Хьусена, тахан инарала цIи лелаеш ва из. Цун гIонча из волча хана, даьккха да ер сурт, депутата седкъа цунна дIаболлаш воалл Черепков. Хьусен «Халкъа фронт» яхача цхьанкхетарца болх беш хиннав вай республике, карарча хана из къахьегаш ва МВД болхлой ветераний цхьанкхетарца.
Дувцаш дола сурт цу тIара гуш волча шин сага кулгаш а яздаь, сона совгIата денна да 2013 шера маьтсела бетта 9-ча дийнахьа. Вешта аьлча, нийсса 20 шу хьалха.
