Цхьадола къаьна хӀама а накъадоалаш хул
Газо тийшаболх хьабу, цох лоралуш ца хилча
Вайна массанена а ховш да, газ мел унзара хӀама я а мел тебаш тӀаяйя хьаду цо цӀаккха тоалургдоацаш дола хатар а чов а. ХӀаьта а, цхьайолча хана, цунца бегаш-м бу вай. Масала, телевиденерча цхьан рекламага хьежача, язде безам хул укх тайпара мугӀараш:
«Если в доме пахнет газом,
Накрывайтесь медным тазом».
Бегаш-м бегаш ма бий, амма газах во хьадаьнна моттигаш шергара шерга ювлаш хьайоагӀаш я. Каст-каста дувц цу оагӀонцара болхлой нахаца вӀашагӀкхетараш дӀакхухьаш хиннаб, царна хьехамаш даьд, яхаш. Иштта де дезарий йоазув тӀадола каьхаташ а декъ цар. Цкъаза хьалха леладаьча цу тайпарча наькъех а пайда эца мегаргбар аьнна хет сона, уж ширдаьннад аьнна ца дуташ, цар а дикка пайда бахьаргбар, нах хатарех лорабеча даькъе. Белггала аьлча, малагӀа ба из наха накъабаргбола хьехама никъ? Со зӀамига волча хана, Наьсаре дӀа мел луш йолча квартире латтача прометейканна е лувчаш хий дӀохадеш хиннача котёла юххе сийна бос бола аьшка листаш йоахкаш хулар пен тӀа, газах мишта пайда эца беза, сенах лоравала веза дувцаш. Цар хӀара газ хьал мел согача хана а дӀа мел йоаеча хана а дагадохийтар наха, цу сийнача алах чӀоагӀа лорабала безилга. Укх тӀехьарча хана, дикка зама я сона цу тайпара даь хьехамаш цхьанна а фусаме бӀарга ца гу. Цох ширбаьнна никъ хеташ, дита хургда цар цу тайпара хӀара квартире даьхка аьшка тӀа да йоазош. Амма из нийса дац аьнна хет сона. Уж кийчдеш а яздеш а газа оагӀонна зе хуле а, наха накъадоалаш, уж ийрчача, унзарча хатарех лорабеш дар уж. ХӀана мегац тахан а цу наькъах пайда эца?! Цо дикка гӀо дергдар, аьнна, хеташ ва со, наьха кхерамзле Ӏалашъеш. ТӀаккха кӀезигагӀа хила мегар унзарча Ӏоажало кхухьа нах, доагаду, Ӏазапе увтта бераш.
Цу хьакъехьа къамаьл мел доладеча хана, сона дагаух дунен чура газ бахьан долаш ханал хьалха дӀабаха бовзаш, безаш, гаргара хинна нах. Со зӀамига кӀаьнк волаш, Наьсаре-м цу тайпара йӀовхал луш бола гӀирс бацар, Шолжа-ГӀалий тӀа вахаш вар тха тайпан ТӀукий Хьасан яхаш саг. Вай Сибрера цӀадаьхка дукха ха ялале, ламаз деш ваггӀача веннавар из воккха саг, хӀаьта сесаг прометейка тӀа котамаш морцаш латтача Ӏоежа хиннаяр. ФуннагӀа дале а цхьа хӀама харцахьа даь хиннад цар, шаккха а газах байнабар мари сесаги. Цигара цар декъий цӀа а дена, тха даь-дас, Наьсаре таьзет а дилла, дӀабехкар уж нах. Йоккха сагото яр из цар дезалхошта а уж бовзаш мел хиннача наха а.
ШоллагӀа моттиг нийсъелар МагӀалбика кхале. Из со студент волаш хинна хӀама дар. Арахьа газ хьаухаш, цун хьаж йоагӀаш моттиг хилча дукха из хӀама теркал ца деш нах хул. Бакъда из мел цӀенхашта да ховре, цхьаккха саг Ӏергвацар цу тайпарча хӀаманна терко ца еш, газа болхлошка телефон ца тохаш. Наьсаре вахаш вар тхоца ишколе деша ваьгӀа Шахмарзанаькъан Мухьмад. Цун да Мухарбик Сийлахь-боккхача Даьймехка тӀем тӀа хинна, наха а мехко а лоархӀаш саг вар. СагӀа деча а хинна, ший машинаца цӀавоагӀаш вола зӀамига саг газа турба ийккхача, из хьаухаш латтача моиттиге нийсвеннавар, цига хиннача хатарах ваьгавар из.
МугӀарерча наха а из болх бечар а, фийла болаш, лораде дезаш да газ хьаахар яхар санна дола хӀама. ТӀаккха, цӀенденна дӀа ца доале а, кӀезигагӀа хургдар цунца дувзаденна хатараш.
Со воккхалгахьа лестача хана, Сурхо тӀа хинна хатар а ца хьоадича валац со. Тхоца ийс шера дешача ишколе къахьегаш а хинна, керда №3 йола юртара ишкол хьайийллача цига дӀаяхар завуча болх бе Бохтаранаькъан Раиса. Хьаихача газах, Ӏуйрийна шоай цӀагӀара лампа хьалсогаш хиннача хатарах елар из, бераш а чӀоагӀа лозадаьдар.
Уж шеддар дагадехача, массаболча наькъах пайда эца мегаргба аьнна хеталу, нах газах лорабеш беча балха тӀа. Цох улгаш хьалдетта деза квартирашкарча пешкашта юххе, автобусашка, ишколе, наькъашка увттаеча баннераш тӀа, кхыметтел берий бешамашка, нах дукха тӀалаттача моттигашка, иштта кхы дӀахо а. ТӀаккха газо беча тийшача балхах бовргабацар вай вежарий а йижарий а. Из хӀама даим дагалоаттаде деза.
