Мархий бетта хьурмат
Дала денначун хам беш, даха деза вай
Безача мархий бетта денош лоацлуш латт. Эккхайича санна, йода ха. Сиха дода ди сайренгахьа, ма лоаца а да хӀанзара денош, яхаш, шоайла дувцаш хоз наха. БӀарччача шера хьеж вай Рамадан беттага. Вайх хӀаране дукха хӀамаш да цу беркатеча, Дала вайх хам баь варгвоаца къахетам баь хьаеннача ханаца дувзаденна. Мархий бетта деш дола дуӀаш а къаьстта дӀаьхий хул, дог тийша да вай, дийхар Дала ший боккхача низаца лургхиларах. Цхьа ший тайпара хет-кх, кхыметтел гонахьара Ӏалам а укх езача хана. Ювца велча, йийца ца валлал хоза ха я-кх ер! Лораде дезараш а дукха да вай, мархий хана. Хьоаха ца деш дита ца могаш а, дукха хӀамаш да. Царех ала лов-кх тахан... Марха даста кӀир совгӀа ха йисаяле а, базарашка, тикашка, Ӏоотта моттиг йоацаш, готта я. Ма даггара удаш, кийчо еш, дикагӀа, хозагӀчунга кхача гӀерташ, сатем байна лел нах. Цкъарчоа-м, цу сурта бӀарахьежаш, хеталу, селлара хала хӀана даьд-хьогӀ наха шоашта е хоза гӀулакх, атта, сабаре, сатеме дӀадихьача дикагӀа дацар-хьогӀ? Бакъда вай къам Ӏемад, тхьовра денз, марха доастача денга кийчо еш, беррига низ Ӏобилле, цӀагӀа мел дола ахча дохкаш, ада. Вай къаман Ӏадат хинна дӀаэттад из. Кийчо яр, цу гӀулакхаца дог ловзаш, сакъердалуш адар-м дика да; бакъда, тӀехдаьннача хӀамах, исроаф хила тарлуш долча гӀулакхех чӀоагӀа лорадала деза вай.
Даьла духье лелаеш бола нах, Даьла къахетамца, дукха ба вайна юкъе. Цу мугӀарербараш, ма хулла наха гӀо де, маьл баккха хьож бӀарччача бетта. Бакъда цхьаболча, хӀама йохкаш болча наха мархий ха гаргаэттача тӀатохаш долча маьхаша бахархошта хьовзам бу, деррига а халача доаккх. Дуаш мел долча хӀаман, барзкъий, кога тӀарча гӀирса, цӀагӀа Ӏоувттаеш, хьалъохкаш мел йолча хӀамай маьхаш, боарам боацаш, урагӀдолхаш нийслу. Мискаш, нах, дехьарчо, сехьарчо, эгӀа вахача лоалахочо ма доаккхий ший цӀагӀара, коара хӀама эрга, аз а дергда-кх сайна могар, аьле, хьаккхе, цӀагӀа мел дола ахча дохка отт. ХӀаьта вайна юкъе дукха ба таро хала, во йола нах, да тӀавоаца дезал, цхьаккха саг балха воацаш, ер ма дий аьнна хӀама хьатӀацадоагӀараш. Долчо-м дӀалургдар из, вӀалла мах ца къовсаш, доацар дагавоаллаш хул-кх, къахеташ. ВӀалла хьалха бӀарга ца дайна, тайп-тайпара даараш хьачуоз базархоша. Цу базар тӀа йохкаш мел яр, истола тӀа ӀотӀаоттае ше декхарийла волаш санна, хет цхьаволча сагá. ӀотӀаоттаяр-м хӀама дацар, мархий цӀай дӀадаьлча, шарххенца богаш дизза ялаташ вай дӀа ца кхувсаре! Диъ ди доаккхаш истола тӀа лаьттай ераш, котамашта дӀатовса дӀатӀехьашкаяьхе, яхаш, дукха ахчаш Ӏо а дехкаш, хьаийдаьча даарий тӀеххьара соцаш йола моттиг цӀен тӀехьашкара совлен хӀамаш дӀакхувса кӀоаг хул.
Дуккхача фусамашка латташ хӀама да из хӀара шера. Цох оал вай дино исроаф! Ялат доадарал вогӀ гӀулакх хила йиш яц! Зехьа хӀама доадеш вола саг, шайтӀан (аузубиллаьхь) доттагӀа ва, аьннад. Укх доккхача дунен тӀа дукха бусалба адам да моцало, къело кӀалдита, маькха йист, кӀи фийг миссел багакхалла хӀама доацаш, бусалба нах бовш латташ а моттигаш я. Тахан, вайна массанена хьа а гуш, интернете йолаш я уж моттигаш. Уж нах дагабехе а, пӀелг миссел мара доаца ялат доаде кхера деза вай. Эггара нийсагӀа да, ца эша, совлен даараш хьацаийдар. Къахетаме волча АллахӀа лоаттадеча берката хам беш, хоастам беш хуле, цхьа хӀама доадергдац вай.
Къаьстта, маьхаш боарам боацаш тӀадетташ болча дукхагӀболча базархошка ала ловра, «Даьла раьза воацаш Ӏоадаьр, да раьза воацаш дӀадода». Наха хӀама хала деш ма хила, йоах вай дино. КӀеззига Даьла духье лаьца, кхеллачо дикагӀа пайда бергба-кх сона, деррига а гуш ма вий из, аьнна, нах эггара сагота кхестача хана, уж маьхаш ай ца деш Ӏийча, Дала беркат дикагӀа дергдолга тешшаме да! Бусалба сага дог хьаьста, цун атто яь саг, Дала кӀалвутаргвац! Вай массане а теркалде эшаш хӀамаш да уж. Ший доалахьа тика йолаш хиннача цхьан гаргарча сага, мархех хӀамаш ийяьча наьха декхараш дӀаяздаь хинна тетрадь книжка миссел дар. Ши шу, кхо шу хьалха хиннача мархех хьаьрча декхараш доахка нах ба укх тӀа, аьлар цо. Оалаш да-кх, хӀара саг дика де хьежача, дунен тӀа вӀалла во хургдацар-кх аьле... Бусалба дог къахетаме, ший бусалба вешех, йишех лазаш хила деза. Даьла духье лораеш вай дахе, мах баь варгвоацача иразах дизза хургда вай денош! АллахӀа гӀо долда вайна, беркатеча хӀаман тӀехьа! Дикаш доаржадеш, дӀадаха низ ма эшалба вайн!
