Цунна чубоагIаш бар цIихеза иллиалархой Новрбенаькъан Руслан, Беканаькъан ИбрахIим, Дзейтанаькъан Тимур, Янданаькъан Тамара, Сон Семён, цун инструментальни ансамбль. Укх шера нийсса 30 шу дуз, из кхоллама тоаба хьайича денз.

Хала хете а, тахан из йоацаш я. Цунна юкъера цхьабола иллиалархой бакъдунен чу дIабахаб. Царех ва иллиалархо, театра а кинон а актёр Новрбенаькъан Руслан. Из геттара гIоръяьнна болх беш хиннача 1995 шера, цун артисташца къамаьл де а, царгара ийцача интервьюна газета тIа кепа тоха а вIаштIехьадаьлар са.

Цу заман чухь цу тоабан композитор вар эрсий зIамига саг Семён Сон. Цо дийцачох, Москве массазара викалаш хургбола фусам хьае мукъа беннар Овшанаькъан Руслан хиннав, из дош кхоачашдаьр, чакхдаьккхар — Хамченаькъан Билан. Керттера декхараш дувзаденна хиннад, концерташка гIолла къаман культуран боарам лакхбарца, говзал йолча берашта гIо а деш, царна культурни оагIорахьа дегIааха новкъостал дарца. Цун репертуара юкъейоагIаш хиннай халкъа ашараш, вай заман иллеш, И. Баха, В. Моцарта, П. Чайковске классически ашараш.

Керда юкъедоаладаьча иллей хьалхара ладувгIархой хулаш хиннаб Хамченаькъан Билан, зарбан болх лелабеш вола Угурчанаькъан Мухьмад, моллагIа хIама де лаьрхIача хана, уж дагабоалаш хинна Белхарой Хьамзат.

«Лоам» яхача тоабо новкъостал а деш, Центральни телевидене «Iуйранара седкъа» яхача передаче дакъа лаца таро хул Наьсарерча берий «Асса» яхача халхара ансамбла. Из геттара дика тIаийца хиннай передача дIахьош волча Николаев Юре а телехьажархоша а.

«Лоам» яха тоаба концерташ луш хиннай дуккхача моттигашка, цул совгIа, вай республикерча МагIалбика, Наьсарен, Шолжа кхалешка а хиннай из. Уренгой яхача шахьара 15 шу дузаш, цига хьийха хиннаб вай мехкахой. Цар цига деннача концерта юкъе дакъа лоацаш хиннаб гIорбаьнна иллиалархой: МагомаевгIар Муслим, Кабзон Иосиф, Соткилава Зураб, Леонтьев Валерий, «Нана», «Рондо» яха вокальни тоабаш. Цига Кабзона безам эттаб вай республикан культуран денош Москве долча хана, царна юкъе дакъа лоацаш хила. Иштта «Лоам» яхача тоабан иллешка ладийгIа а хьаьший книжка тIа йоазош дита а хиннад Громов Бориса, Лужков Юре.

Карарча хана «Лоам» яха тоаба, аз лакхе белгала ма даккхара, йоацаш я, бакъда цо даьха иллеш наха дезаш, тоам беш а, каст-каста ладувгIаш а да. Царех да «Лорса Лида», «Даймохк дагаухар сона» «Асса, асса, Мухьмад», «Лаьтта-нана», «ГIалгIай полка 1914 шерара гимн», кхыдараш. Вай къаман культуран юкъе дикка юкъ а моттиг а дIалаьца ансамбль санна, дагахьа йисай из безаме тоаба.