Дукха ба вай къаман гӀалгӀай метта йоазув дегӀадоаладеш, мотт шерагӀа, кӀоаргагӀа боаржабеш къахьегараш. Царех яр ер кхетаче хетаяь хинна, тахан вайна юкъе йоаца ТӀумхой (Джименаькъан) Вахий Хьава. Цо йоазонна тӀехьа дукха къахьийгад. Къаьстта цо язъяьча байтех дувцаш, цун кхоллама никъ дагалувцаш, яр кхетаче. ВӀашагӀкхетар дӀахьоча хьоашалгӀа баьхка хилар вай йоазанхой. Уж бар Коазой Ӏийса, Ноакастхой Хаваж, Мерешканаькъан Султан, Хамхой Дауд, иштта кхыбараш. Магасерча №2 йолча лицея хьехархочо Джандиганаькъан Заремас, ше тхоца къамаьл деш, белгалдир, укх тайпара вӀашагӀкхетар, тахан метта хьал диц ца далийта а иштта берашта цхьайола моттигаш кердаяха а чӀоагӀа эшаш да, аьнна. Цудухьа бераша, гӀаддаха, шоашта тӀадилла декхар кхоачашду, аьлар цо. Укхаза дукха хаза йиш яр гӀалгӀай йоазанхочун ТӀумхой Вахий Хьавай байташ. Царех оттадаь иллеш а дар, лаьрххӀа йолча ансамбло дӀаоалаш. Гулбеннараша дика салеӀар укхаза.

Хьаьшашта юкъе хиннача Коазой Ӏийсас белгалдир, укх тайпара вӀашагӀкхетар эшаш хилар. «Вай къаман йоазув бӀаьшеренашка денз хьадоагӀаш хиларах тарра, тахан а, из бухбувла хьаст дӀалакъарга а ца хьежаш, из совбоаккхаш хила деза вай къам, — аьлар цо. — Вайчул хозагӀа Ӏадаташ, эздел долаш атта къам нийслургдац укх Кавказе, нагахьа санна меттацара хьал вай кӀалдуте, из деррига а доацар санна да, тӀаккха къам а хургдац бух болаш», — аьнна, чакхдаьккхар цо ший къамаьл.

ДӀахо дош делар Мерешканаькъан Султана, цо баркал аьлар иштта хоза ер кхетаче вӀашагӀъелларашта, къаьстта ишкола кулгалхочунна Кхоартой Зарайна.

«ЛерхӀам хилар да ер, наьна меттаца лерхӀам боацача моттиге, моллагӀа из яле а, къаманца а бала боацилга да», — аьлар Султана.

Кхыча хьаьшашта дош делар, царна юкъе яр ТӀумхой Лейла а, из яр Хьавай йиша. Цо ший аргӀагӀа йиший хьакъехьа дийцар, иштта, хьаьшашта баркал оалаш, къамаьл дир. СалоӀам хинна, раьза болаш, дӀа-юха къаьстар гулбеннараш.