МалагӀа тайпан цӀи лелае лов берашта?
Дешархошта хетараш
Бер малхадаьлча, цунна малагӀа тайпан цӀи елча бакъахьа я, яха, хаттар кӀезига отте а даьшта-ноаношта хьалхашка, хӀаьта а отташ нийслу из. Вайна ховш ма хиллара, дукхагӀа долча гӀалгӀай бераша даь тайпан цӀи лелаю, хӀана аьлча тайпан фу дебаде дезараш ба тӀехьа тӀакхувраш.
Къаьстта из доагӀаш да кӀаьнкашта, фу ца хадийта дезараш а, даьй тайпан цӀи малха лоаттае езараш а уж ба. Фу хет-те цу хьакъехьа берашта шоашта? Цу хаттара жоп лехаш, 8-ча классе дешаш волча 20 дешархочунга хаьттар аз; малагӀа тайпан цӀи лелайича бакъахьа хет шоана бераша, аьнна. Берий уйлаш екъаелар, цаӀаш даьгахьа озабезам беш бар, вожаш – наьнагахьа.
ХӀаьта а царех дукхагӀбараш, вай Ӏадато яххача беса, шоай даь тайпан цӀи лелае ловш хилар. Цу тайпара вар лакхе хьоахабаьча дешархоех 15 саг. Тайпан юкъе, даьй баьхача лаьтта бахаш хилча, тайпан цӀи а даьяр хилча бакъахьа хийтар царна. Кхо саг наьна тайпан цӀи лелае ловш хилар, уж йиӀигаш яр. ХӀаьта юхевиса ши саг шоашта моллагӀа тайпан цӀи бе-башха яц, яхача уйлан тӀа сецар.
