Маьл баккха ховш вола саг

Мужеча даьха нах да тхо, вӏаший юххе цхьана хьалкхувш. Зӏамсаг волаш, ший ха хул, цу хана уйлаш кхыча тайпара ю, воккхагӏа мел хул саг динца чам болаш, из лелабеш вах. Тахан цу шахьаре вовзаш а волаш, саг венна-ваьнна моттиг хилча наха дӏавехаш, лоархӏаш ва Ахьмад. 

Цун эггара дикагӏа дола дакъа да, наха юкъе волаш, венна саг, юха ца гӏерташ, лувчавеш хилар. Из чӏоагӏа маьл болаш хӏама да. Моллагӏчунна дулургдац из. Ахьмад цу гӏулакха кийча ва, Даьла духьа леладу хӏама дийца варгвац. Зерате бийсаш лелаю, Дала къайле цӏенйойла цун, Иласхан-Юртарча Киший воӏ – вай Устаз ваьхача Артан тӏа дукха нах кхийлаб ший машинаца ахча доацаш, цига дукха уралаьтта ва из. Цо цхьа хӏама дувцаш, цецваьннавар со. 

Урус-Мартанера цхьа бусалба вошас аьннад, иштта дӏавелла Краснодаре ший гаргара саг ва, из хьаваьккха цӏава везар. Цунна оарцагӏваьннав Ахьмад, ахча доацаш, Даьла ший духьа, цига ваха, хьаваьккха, из лувчаваь, цӏавена дӏаволлийтав цо ший нахага. Из мо дола хӏама иштта моллагӏча сагага дулургдолаш дац, хӏаьта укхунна из карагӏдаьннад. Дала низ беннаб, нийсача хӏаман тӏехьа.

Хӏанз тӏехьарча хана дукха нах бов лазарах тха тайпан а кхыча тайпан а, уж лувчабеш, дӏабохка кечбеш, из гӏулакх леладеш хьавоагӏа из. Цу тайпара маьл хургбола хӏамаш кхы а леладу цо, масахьате вийхача, цига вода, нийсхо е гӏерташ, дикадар, бакъдар оалаш вах Ахьмад, шийнна дукха халонаш, харцахьа-бакъахьа хӏамаш дайзача малха. Фу дергда, иштта дуне да-кх ер?

Хӏанз воккха хиннав, дукха гӏо эш лорашкара дарба дара. Со ала гӏерт, иштта бола нах эша ма болба. Хоза сий доаккхаш, наьха хатар ийккхача дегаш кӏаьддеш, наха вах из. Тӏеххьара аргдар аз, дуне цкъа мара луц вайна Дала, наха юкъе хьагӏ, «аз» е «со» яхар доацаш; морзо, барт хургбар леладеш; халахетар хилча из дужадеш, къинтӏерабоалаш; цхьоагӏо йолаш латталба Гӏалгӏай мохк. Бахалба гӏалгӏай къонахий!

Балайнаькъан Хьасан