Хьаькъал ирдеш йола яхьаш
Дикагӏа вола хьехархо белгалваккха лерхӏ
Хӏара шера вай мехка тайп-тайпара хьехархой кхетаченаш а яхьаш а хул. Уж хетаяь я вай ишколашка къахьегача хьехархой болх кердача, дикагӏча лагӏа тӏа баккхара, дийша арабоалаш бола кагирхой хьаькъалаш кӏоарга долаш, массайолча оагӏорахьа дегӏабаьхка нах хилийтара. Цу мугӏарера яхь я укх деношка Росси оалача боккхача мехка дӏайолаеннар а. Из я «Наьна меттеи литературани дикагӏа вола хьехархо» яха Ерригроссийски яхь. Вай республике из йийкъа хургья шин даькъа, юххьанца муниципальни, цул тӏехьагӏа мехка къовсамаш хургда, говзал дикагӏъяр вовзийташ. Массехк хӏама да цига дакъа лаца ловча сага ший дехар тӏа дӏаязде дезараш: ше малав, фу болх беш ва, мел ха я хьехархочун къахьегамца вувзавенна, телефон, электронни почта.
Муниципальни яхьаш вайцига хургья Пхьилекъонгий-Юртарча №4 йолча СОШ укх бетта 20-ча дийнахьа, Мехка яхьаш хургья Наьсарерча №18 йолча СОШ маьтсела бетта 26-ча дийнахьа. Яхьашка котбаьннача хьехархошта, министра амаро яхачох, хьехархочун балха тӏара лакхара категореш лургья, цунца лакхлургда царна доагӏаш дола алапи а.
Хӏанззе а вӏашагӏъеллай цу яхьа кхелахой тоаба. Наьсарен кхале из болх беш хургба дешара урхаллен болхлой Коазой Людмила, Зовранаькъан Зарета; кхален методически кхела кулгалхо Джименаькъан Лейла; Долакха-Юртарча ишкола хьехархо Тӏоалданаькъан Хьава; Эккажкъонгий-Юртарча №1 йолча СОШ хьехархо Итазанаькъан Паьтӏамат; ГКК наьна метта хьехархо Берсингова Марем.
Аьттув балба массане, поалхами хьаькъали дукхагӏа дар котвалва!
