Со хьоахаде гӀертар-м дуккхача наха къувлаш, сатем боабаь хӀама да... Ара шелал хьаоттарца, эггара хьалха дагадох цӀа доацаш лела хьайбаш, ма дарра аьлча, доал доацаш лела цискаш. Уйла е эттача, чӀоагӀа тамашийна да укх дунен хӀама... НийсагӀа аьлча, тамашийна ба-кх нах...

ЛерттӀа шийна чуӀе моттиг йоацача цхьаволча сага ворхӀи, бархӀи циск леладу хийла цӀагӀа. Сона сай бӀаргашца дайна хӀамаш да уж-м. Шоай берашта санна цар кӀоригашта доал деш, цамогаш хинна циск лорашка кхувлаш, маьхий детташ, хан-ханнахьа лувчадеш, нӀаний хургдоацаш молхаш мелаеш леладу. Сона йовзача цхьан кхалсага 35 эзар сом ахча Ӏодиллар, арара хьачуденача цхьан циска кӀорига дарба деш

Кхыметтел операци тӀехьа яйтар цо цунна. Доккха хӀама дар, из кӀориг тоаде гӀерташ, хьайбай лор волча ухаш, таксех цо Ӏо мел дилла ахча. Ма ираз да-кх хьа Дала иштта къахетаме дог денна, аьнна, хийтар сона цо леладечун бӀарахьежаш!

Бакъда сона а шоана а дика бовза хургба, Ӏан шелал латтача дийнахьа, дӀадала бӀаргагучара, яхаш, хӀамаш етташ, наӀаргара уж миска хьайбаш лелхадераш. Ма даггара уйла йича, цу наьха кер чу фу доалл кхета магац сона! Ай, фу хургда цу хьа цӀенах, шийлача дийнахьа цискага бийса яккхийтай аьнна?! Из фусам хьайна хьаеннача Далла хоастам баь, Даьла ший духьа, аьнна, Ӏа из цӀагӀа чудитача, хьайна Даьла раьза вергвар Ӏа! Цхьа даладоалла циск чувхадеш, йоаллача сагага:

— ХӀама тасса цунна, моцало кӀал ма дитадий из, — аьлар аз.

— Тоссаргьяц, тӀаккха-м хӀара денна хьаухарг ма дий из, — хезар сона.

Ма къа да-кх хьа, аьнна, хийтар сона... Дала хьайна доккхача дикага кхача тарлуш бола аьттув белча, из кхетаде иман, низ хиланзар-кх хьа! Тахан цу мискача циска тесса хӀама, кхоана доагӀаргдолча къематдийнахьа Дала бӀаргаяйтаргьяр хьона... Бакъда хьа дего из кхетадац, хьагучох! МӀарга Ӏетта циск цӀагӀара аракхосса-м доккха хьаькъал эшац!

Из гӀулакх хьалъийдеш, дувцаш латташ да вайцига дог лазараша. Дика хургдецарий хӀара сага ший коа, шелалах хьулале йиш хургйолаш, цискашта лаьрхӀа дахчах зӀамига бунаш оттайича? Хьастам Ӏочутоха ховш волча сага хьадуларгдолаш дика да-кх из!

ЦӀагӀа эшаш йоаца цхьа тиша хьамаш дӀакӀалъяьхка, хьадаь цӀалгаш Ӏооттадича, гӀорадаь дагӀа цискаш, ла ца леш, Ӏангара довргдар, Даьла къахетамца. Кхы доккхагӀа дика хургдий, хьай низаца Дала хьакхелла цхьа дийна хӀама кӀалхардаккхарал?! Тахан Кхеллачо хӀаранена хьабенна аьттув ба из!

Сихлелаш дика гӀулакхаш де, тахан оаш хьадаьр, кхоана бӀаргагургда шоана яхаций вайга дино?! ХӀанад вай селлара къиза, хӀана биц вай цу хӀамай лерхӀам?! БӀаьстан денош хьаэттача, лоа дешача, гӀорадаь дайна дада цискаш гучадоал. Унзара хӀама да из, бусалба нах бахача моттигашка! Котельни е цхьацца тиша цӀа доацаш саг вац, ковнаш долаш бахарашта юкъе. Ай, саг къевала, йоккха хало хила хӀама да из?! Хьасомадаккха хьай дог, бусалба саг!

Къахетаме бараша-м квартирашка а леладу цискаш. Деррига дӀадаьлча, цисках лаьца хьадисаш ма дий вайна! Ше моллагӀа дика дича, дега тоам хулаш хила везаций бусалба саг?! Тесса ца а дуташ, теркалде вай из гӀулакх! Вай дерригаш оарцагӀдаьлча дуккха синош кӀалхардоахалургда бирсача шелалах! Уж мо долча хӀамаша вай дегашта хало ца йой, сенах хало хургья вайна, аьнна хет...

Бераш тӀехьадаьха дӀакоа ваьлча, моллагӀча маӀача сага, йоккха юкъ ялалехь, хьадергдар мискача цискилгашта из цӀалг. КӀалха цхьа тиша ювргӀа билле, малх дикагӀа тӀалаттача Ӏооттаде, Даьла раьза хургва вайна тӀаккха... Къахетаме хила вай, ва бусалбаш!